星島日報

福善心火湧現

2020-10-10 00:00
  由於周日賽事出賽馬不多,加上普遍參戰馬在前日試跑,昨朝場面較冷清肯定之事,同時大部分騎師較遲到場,皆因主力為馬匹試閘。
  「老撾之光」楊明綸跳三段,幾日前跑完照做快工夫,操練安排好少見,沿住內欄順走,去到最後一百米才轉腳,所以整個過程未算太順暢,勁度亦好一般,純講外觀無問題,馬身夠壯夠飽滿,但狀態未見有所突破。
  「旺舖必星」戴眼罩及頭罩由薛恩跳兩段,貼內欄而馳,馬身收得實淨,毛色夠油潤,不過談不上吸引,出腳步緊緊欠開揚,又多番頭擰擰,進度徘徊暫欠好感。
  「馬爾代夫」助手跳兩段,從容不逼走過,入直路轉腳動作流暢,雙目有神朝氣勃勃,馬身靚展現線條美,今季大有進步,稱得上昨朝最弗的馬匹。
  「福善」戴頭罩由助手跳一段,一貫戴埋交叉鼻箍出試,沿外欄按慢走,終點前主動想走心火湧現,神態亦明顯回旺,比起上仗賽前推騎唔走,簡直兩碼子之事。
  「雙節棍」戴頭罩由助手跳三段,綁埋脷出試尚算專注,然而跳來欠缺氣勢,更帶點懶性,在直路鞍上人郁手等佢套口卻依然唔肯走,火力俱弱,有待磨練。
  「星夢帝國」戴眼罩由梁家俊跳兩段,跟住廄侶「豪情勁駿」,一直保持三個馬位距離,長韁吊住唔急唔搶,愈見收斂成熟進步,今季慢閘毛病也搞好,進度已踏上最佳時候。
  「都柏名駒」戴頭罩由史卓豐跳一段,愈來愈淡定,快慢由人聽教聽話,上仗陣前扭計偶一為之,而且今課氣定神閒之餘,走勢又爽,落腳輕巧有彈力,近況充滿好感。
  「道道」戴眼罩及頭罩由助手跳一段,試得規矩,無岳頭無搶口,馬身一直做得好靚,毛色烏卒卒同樣好睇,進步且勇漸入佳境。
  「創高峰」助手跳一段,腰身長長,外觀普普通通,走勢亦平淡,唔夠火氣唔夠勁勢,看腳法偏向中長途,較慢熱無可厚非,狀態未及水準。
  「簹多福」戴眼罩由助手跳一段,去到拉士百五米先畀佢走,迅即交出凌厲衝刺,擔高頭走神氣十足,且出腳夠咬地力度充沛,勇況已備。
  「快馬飛馳」戴頭罩由助手跳兩段,聚精會神,步順暢勁度夠,然而毛色唔太靚有點淡,火力只屬一般而已,遠遠不及銳利時候。

最新回應

相關新聞

「超新星」心火湧現

2020-04-11 00:00:00

元朗之星極吸引

2020-10-08 00:00:00

「協進神駒」進度理想

2020-05-11 00:00:00

「南莊之歌」後追最掂

2020-10-21 00:00:00

熱門文章