星島日報

都柏名駒狀態托弗

2020-07-02 00:00
  大多參戰馬留待今朝試跑,昨朝出跳馬當然不多,幸好尚有石、文廄撐場,而且有不少勇馬。另外,莫雷拉、史卓豐及賀銘年等都有到場操馬。
  「好友益」戴頭罩由巫顯東拍「萬里威揚」跳兩段,汗濕多改不了,然而試來甚活躍,走勢硬朗有火有力,馬身喼得壯,年紀雖老戰力未減,近期轉戰泥地千二,更闖出一片天。
  「世紀舞王」戴頭罩由助手跳一段,雖然豎住尾走,但都算集中,肯聽取鞍上人指示,不過力度好一般,馬身略肥,慢熱上力平平。「大笑星」蔡明紹跳兩段,直路快開反應平常,馬身唔算收得靚,出腳亦拖泥帶水,初起未得。
  「紅海福星」賀銘年拍「紅寶舍」跳三段,逐步加速反應好,步幅開得闊,動作又流暢,神情專注,表現唔似質新馬,已準備就緒。 「電訊火箭」戴頭罩由助手拍「好甜橙」跳兩段,試來清風送爽,步順開揚勁度十足,馬身好靚好實淨,充滿氣勢,體力充裕狀態依然勇銳。
  「都柏名駒」賀銘年跳兩段,愈來愈乖巧,完全唔急好聽話,肌肉結實起柳條,出腳爽勁有力,狀態托弗。「金地飛客」郭能跳兩段,按住跳得唔快,姿態甚輕鬆,外觀好靚身壯色潤,最近拍跳夠勁,試閘反應又好,論態比起贏馬時不遑多讓。
  「智弗拍檔」戴頭罩由助手跳兩段,比較肉身之馬,仲有少少肥態,更大問題是跑規未改善,一再頭擰擰,未太規矩。
  「青心星」戴頭罩由莫雷拉跳兩段,高頭大馬神態威武,馬身靚不在話下,毛色烏卒卒,予人一見傾心之感,曾試泥閘輕鬆取勝,轉攻泥地必合無疑。
  「夢幻人生」史卓豐跳兩段,按住慢試唔急唔搶,神態活躍又有活力,多跑下馬身唔瘦,毛色立立靚,勇態未減半分。
  「好攻勢」戴頭罩由助手拍「清新動力」跳兩段,頭側側步又重,試來甚牽強,外觀亦無太大變化,馬身唔太壯兼毛色淡。
  「駿皇星」助手跳一段,表現放鬆韁口穩定,昔日稚氣不復見,馬身壯碩,神態討好,近況對辦。「合進駒」戴頭罩由助手跳一段,好墜手火氣夠,要緊韁捉到實,保持壯健身型,神態活潑,能力雖見盡,但狀態長期省鏡。
  「運來福星」莫雷拉跳兩段,試來從容不逼,目光銳利神采飛揚,細細隻身實淨,步順輕巧動作流暢,保持上佳狀態。
  「美滿將來」戴頭罩由副練跳兩段,末段加快步伐,力度唔錯鬥心不俗,馬身已做得很好,狀態八九成水準。
  

最新回應

相關新聞

「超新星」心火湧現

2020-04-11 00:00:00

「協進神駒」進度理想

2020-05-11 00:00:00

「北極光」準備就緒

2020-02-29 00:00:00

「叻叻精彩」蓄勢待發

2020-02-17 00:00:00

熱門文章