星島日報

【阿碌開咪】走私提供投資貼士

2020-08-10 11:00
  投資,好多時要有一點聯想力。 

 呢呢,上周小弟睇完一宗新聞,立即少少哋掃咗兩隻股票,分別為九龍倉置業及莎莎國際,決定一揸揸到疫情結束,到時應該有兩至三成利潤!呢點,自問非常有信心。點解?乜野新聞有觸發投資啟示?正是一宗水警及海關的聯合行動!

  上周一深夜,水警及海關經過長時間收集情報及監察,估計大嶼山北部將有走私活動,於是部署埋伏。

  果然晚上十一點,一艘快艇自機場東南面高速駛向一個石灘,靠岸後,立即有輛中型貨車在漆黑中突然出現,將大量貨物搬上快艇。埋伏的探員即時撲出截查,但仍被匪徒跳上快艇逃脫,直衝內地水域。留下的貨物,犀利,超過一百箱!全部名貴貨品,包括花膠、燕窩、名酒、名牌服裝手袋、高級美容護膚品、古巴雪茄、各式健康食品補品等等,一擺開,恍似一家微型百貨名店!

  今年海上走私非常猖獗,單計已搗破的,已近三億元貨品及拘捕近百六人,早已超過去年的總體數字。點解?你一定估到,正是內地有「柯打」也。一眾暴發豪客,因疫情無法來港掃貨,點搞?當然有中間人「提供服務」。你「落單」,畀足錢,佢就安排人掃貨,再走私回內地,就咁簡單。有求就有供,有人肯出錢,就有匪徒肯冒險走私。

  小弟粗略估計,一件貨品若正常價一萬元,要咁複雜偷運,中間人被拉會罰監禁,咁要幾重「附加費」呢?最少一倍啩?由此可知,內地豪客,出手幾闊綽,而又幾渴求各類名貴貨品。

  好嘞,如今困在內地冇得來港,才會託人走私。假若有一日疫情稍斂,甚至搞掂(終有一日如此啩),咁仲唔蜂擁來港作「報復性大掃貨」?

  掃呢類貨,邊家上市公司食到應?當然是擁有海港城及時代廣場呢類名牌豪客必到之地的九龍倉置業,另外,狂購美容化妝品又如何?仲唔係莎莎國際咩!

  掃番多少,等病毒收工,再收割利潤可也。

曾智華

阿碌開咪

最新回應

關鍵字

熱門文章