星島日報

【阿碌開咪】歸邊大潮勢不可當

2020-08-08 11:00
大家可記得九一一事件之後,當時的美國總統布殊,向全球講過一句殺氣騰騰的說話嗎? 

二十年前香港人聽,只會在電視旁回應一句:「喂,使唔使咁誇張呀?」

呢句說話,正是警告各國:「Either you're with me or with the terrorists!」

即全世界要歸邊,唔好同我講道理!唔支持我,就當你支持恐怖分子。講完立即「開波」,殺到眼中的敵人片甲不留,結果引致更多更殘酷的恐怖活動。

當然,以美國的軍力,打任何一個國家仔,等於獅子撲兔,對手絕無還擊之力。

當時我哋聽同睇,頗有「路人甲」感覺,因唔到肉也。

不過,物轉星移,美國佬醜化完俄國人、北韓人、中東人後……大形勢所趨,輪到威脅佢霸主地位的中國了。

冇乜啱唔啱,總之中美矛盾,急速升溫。由貿易戰到電訊戰全面開打,南海一帶更戰雲密布。如此情況,變成出現:「Either you're with me or with China!」

兩陣對圓,當然喝令所有國家歸邊。西方陣營、日本、台灣、南韓、菲律賓……以至印度,全部冇得騎牆。

兵凶戰危,中國當然亦要先搞掂內部團結。香港《國安法》,就在這形勢下出籠。不止,七月一日內地更推出《公職人員職務處分法》,完全剷除任何現職及退休幹部的外國籍及居留權,要求百分百効忠:「Either you're with me or not with me!」With me者,就可擔任公職,否則一律「清除內地公職及待遇」。退休幹部又如何?取消養老金及醫療保險!一出手就斬草除根。

呢個公職及退休公職者只准做中國人,効忠中國大潮,幾時殺到香港?唔知。只知一定嚟!因特區新入職的首長級官員、政務主任、新聞主任、紀律部隊等,皆已有此要求。

老實,海外的中國人(無論乜籍),都要面臨新形勢,自己執生啦!曾智華

 阿碌開咪

最新回應

關鍵字

熱門文章