星島日報

【阿碌開咪】沒口德的賣魚佬

2020-08-06 11:00
限聚令下,一日三餐皆冇得到食肆坐低慢慢歎,大大將小弟優悠生活習慣打亂。不過,人,總要適應新環境,怨天怨地冇用嘅,最多窒下啲高官「人頭豬腦」,竟然覺得趕晒十萬計打工仔踎街邊食,會更「防毒」,真真荒天下之大謬,收幾百萬元年薪,竟可諗嘢咁冇邏輯,若在私人機構?怕者屁股早畀老闆踢到開花!

高官有司機,有冷氣私人辦公室,有秘書幫手叫外賣,當然百分百冇問題啦。如今搞到咁大民怨,點收科?

有!我建議由林鄭開始,帶埋張建宗、陳茂波、鄭若驊及陳肇始等成棚高官,在攝氏三十幾度烈日或大雨照頭淋情況下,陪打工仔踎街開餐,咁呢,大家條氣可能會順少少,否則,唔日日夜夜咒瓜你班友就奇!

小弟最新的日常行程,基於冇得夾疊報章到茶記歎早餐,又要不時戴着口罩,於是改早上六點,趁天氣清涼又冇乜途人,先急步行斜路作運動。然後再買幾份報章及鮮奶、麵包回家,入房關門,幻想獨自坐在茶記,照歎。

傍晚,則一丁友走落土瓜灣街市買海鮮回家,畀菲傭姐姐莎莉蒸,再開瓶白酒慢慢欣賞其鮮味。

講起到土瓜灣街市買餸,有件事不吐不快。正是上周政府街市之內,有魚檔員工確診,立時令到不少區內街坊彈開,唔敢再入,寧願到附近街邊菜檔魚檔肉檔買餸。

咁搞法,室內街市所有攤販,當然流失大量生意,叫苦連天。

本來市政署已即時再三大消毒、大清洗,做足一切補救措施,但消費者信心,總是要慢慢才能恢復的。但此時有個冇口德的攤販,竟然趁同行病,攞同行命。正是街邊其中一檔的賣魚佬,不停講:「街市裏面有毒呀,買魚,喺呢度安全好多呀,若你入去買,分分鐘領嘢㗎!」

小弟聽在耳裏,但覺非常討厭。喂!使唔使在同行遭逢不幸時,落井下石,大力踩多一腳呀?呢個冇口德的賣魚佬有乜報應,唔知,只知佢呢世都冇咗我呢個客啫!

曾智華

阿碌開咪

最新回應

關鍵字

熱門文章