星島日報

【阿碌開咪】特朗普心虛腳軟

2020-08-03 11:00
嘩,真真從來未見過美國總統可以咁核突。特朗普擺明心虛腳軟,知道近月民望急瀉,連任機會愈來愈微,故此,結合一眾白宮幕僚,尤其國務卿蓬佩奧,狂攻中國,將其「妖魔化」,希望以製造一致外敵挽回國內下滑民望。 

有冇效果?有多少。但觀乎美國傳媒(除咗霍士新聞),差不多冇一個絕對支持特朗普,反之,個個Talk Show節目主持人都以玩殘佢為樂。呢種軟性「抹黑」,比正統新聞更具威力,更深入民心。

當民意一日一日低落,而日子一日一日逼近十一月三日大選,發夢都想連任的特朗普,當然心虛腳軟。呢種心態下,極易陣腳失衡,胡亂出招,不理好醜,但求就手。

上周佢突然拋出聲稱郵寄投票有利選舉舞弊,意圖將大選延遲。貼文在Twitter一出,真真大件事!美國強調百分百言論自由,兼且敵對民主黨步步睇住嚟砌。結果,慘咯,呢下打亂章,有美國人Buy就奇,死到貼地,不但民主黨一齊反對,新聞界更當然唔放過,力指狂特想打蟊波。最最最大鑊,是連自己友共和黨參議院領袖麥康奈爾及眾議院領袖麥卡錫也表明反對,真係乜面都冇晒矣。

明顯狂特呢鋪完全冇先做黨內諮詢,只一己之見,就擒擒青發帖。結果灰頭土臉外,民望勢更進一步下挫,太核突矣。

肯定今次延遲大選提議,乃爆肚之作。若佢之前睇睇美國憲法,必定縮,因寫得清清楚楚,只有國會及參眾兩院才有權更改總統大選日期,這個權並非在總統手上。

唔使太認識美國政治,都應知今屆眾議院由民主黨控制。議長佩洛茜,乃特朗普「仇人」,大家都希望對方在政治上「粉身碎骨」,如此深仇大恨,任何有利狂特的議案,根本唔使慌佩洛茜會畀佢順利通過, 反之,鋪鋪鈎腳就一定會。

總結,特朗普如今已方寸大亂,中國面對佢狂攻,一定要沉住氣忍忍忍,因一還手,等於替佢「助選」!

曾智華

最新回應

關鍵字

熱門文章