星島日報

【阿碌開咪】私隱專員請重拳

2020-07-11 11:00
周三所有WhatsApp男性群組皆幾乎「無一幸免」,收到一條的士車Cam片段。片段當中,一對坐後座的男女,衣着斯文,似是公事飲宴後男送女歸家。車行時,兩人情不自禁,就在車廂內作出「非常出位」親熱行為。 你咪以為車廂好暗,原來經過車Cam,就恍似日光日白,於是,一切就清清楚楚發生了,任何正常人必一邊睇,皆一邊叫不妙。

因為:一、這個的士司機擺明犯法,將車廂內別人私隱行為掟上網公開,法理情皆不容,必受法律制裁;二、言談間明顯男女主角不是夫婦,疑似工作關係,究竟是否在偷情?若是,肯定影響雙方的形象及仕途(聽講已經中招!);三、男女雙方,有沒有另一半,或是有夫之婦、有婦之夫呢?若如是,勢必家庭破裂;四、今時今日的網上文化,兩人將被火速起底(果然,周三下午已全城皆知)。

小弟快速找來某高官問點睇。

「碌Sir,今天要保持百分百私隱,基本冇可能,你問下私隱專員黃繼兒吖,佢都晨早畀人起晒底啦!但話雖如此,今次黃專員仍必須主動重拳出擊,因呢單案實在離晒大譜!兼且一定可以釘到個缺德的士司機,應該做場大龍鳳畀市民及某啲掌握名人私隱片段者睇,若犯,殺無赦,起明顯阻嚇作用。」

高官呷啖紅酒,搖搖頭:「呢對男女主角,尤其男的,看似高層行政人員,真是……They made a huge judgement error!(高官日常皆用英文,故『就口』點。)Taxi is more public than public toilet these days!」大家明白未?

那位死硬的冇道德的士司機,豬咁蠢,因要負好大後果。

首先,全行都知佢靠唔住,乜都可以出賣。其次,唔知有幾多法律手尾及賠償要跟,分分鐘賠甩褲。

呢丁友做法,若惹上惡人,就更大件事,因別人未必用法律來解決㗎!

曾智華

阿碌開咪

最新回應

關鍵字

熱門文章