星島日報

【阿碌開咪 】葉劉升職話當年

2020-07-10 11:00
香港人對葉劉淑儀的觀感,可說是南轅北轍的。不喜歡佢一類,仍然念念不忘二○○三年時串串貢的「掃把頭」,加上佢恨做特首恨到口水流流,冇晒儀態,總是欠缺一點點含蓄品味。

但是在另一極端,喜歡佢者,覺得Regina勝在明刀明槍,唔會陰濕惡毒,且愛惡分清,光明正大,兼且有打甩門牙帶血吞氣魄。官場、家庭及婚姻皆不順風順水,但絕不氣餒退縮,更可以在橫風橫雨、烈日當空下,站在街頭拉直選票,能屈能伸夠硬淨。

我又如何?只覺佢極富娛樂性,不少行為言談,本來是很直率的,但出來就有喜劇感,令人開心。例如公開表演洗腳,訪問途中將腳舉高,更好玩,經常窒呢個、串嗰個,因資歷厚,冇有怕,特首都冇佢符。

上周又爆「笑料」,葉劉話自己當年冇職升,因為得罪陳太,經常越權直接向老董匯報。呢句說話,在傳統官場文化,非常出位又冇大冇細,兼且以陳太的修養及已宣布退出政壇,當然唔會辯白,必變無頭公案。

不過,話說回來,官場內因得罪上司冇得升,真是日日發生。唔使話好似葉劉咁「大罪」,當上司陳太冇到,越權匯報,就算簡簡單單與上司冇乜眼緣或化學作用,已大多數冇得升或拖個天長地久。幸而公務員大部分(以前是)都會做足一世,所以,只要你唔心急,死忍,一招「鬥長命」就掂。

乜係鬥長命?官場之內,上司下屬關係,通常幾年就一調,A上司寫死你,三年之後換B上司,你即有機會翻生。再唔係,捱到C上司又如何?若ABC上司都唔升你的話,咁應該係你有問題了。

鬥長命而翻生個案,昔日香港電台有一單。某白人上司不喜印籍下屬(兩皆高層),竟運用權力調佢到無窗的地牢坐,極盡侮辱之能事。印籍下屬冇反面,選擇啞忍。終於某天,「頂爺」突來一招「以印制洋」,印籍高層轉而騎在一眾白人同事之上。嘩!場戲精采到呢。

曾智華

阿碌開咪

最新回應

關鍵字

熱門文章