星島日報

【阿碌開咪】送畀下任特首的禮物

2020-07-06 07:28
建制圈中早早盛傳,中國完成大家必須硬啃的《國安法》後,就會推出懷柔政策,一擔擔「砂糖」倒落嚟(股市已見明顯迹象),等大家盡快「歌舞昇平」。

當中,撒手鐧之一,為由上而下協助香港解決土地問題。

建制派政黨當然早早聽到風聲,於是搶先建議中央研究桂山島大型填海,然後租借予香港建公屋,一次過解決深層次難題,好讓香港「和諧地」(得?)重新上路。

究竟建制政黨最終能否「成功爭取」?好快揭曉。不過,有「建制精英」笑指:「呢個計畫,應係送畀下任特首的禮物,等佢一上場就展現好腳頭!」

吓……咁即係……好,放長雙眼睇點發展先!

講到桂山島填海,香港官員又點睇?昨晚與退休局長B哥摸酒杯底,佢職責也曾涉及土地政策,掌握資料,當然比普通人高N班,所以,睇法絕對值得參考。

「碌Sir,我真係唔贊成由中央出手,由上而下拍板解決香港土地問題。因為一國兩制之下,特區政府冇理由唔自己搞掂佢嘅!」B哥著名屬有原則,有Gut Feeling的前局長。「尤其要去到桂山島填海。先勿論地區是否太偏僻,等於將基層市民『發配邊疆』,更重要,咁做會好乞人憎!」

乞邊個憎?正是內地官員及同胞也。

眾所周知,內地不少人皆對香港這個特區非常眼紅又妒忌,因過渡後享有種種特權,包括既有的一切自由(通訊、新聞、金融……)外,又不用向中央繳稅。市民個個唔使當兵,更毋須貢獻軍費,一國之下,香港人享盡內地人冇的權利,早已種下嚴重眼紅症。

如今若再入內地「搶地」,肯定更乞人憎。點解?內地高官曾語B哥:「你哋香港有過千平方公里土地,用在建屋方面,僅七點幾巴仙,只要開發多一巴仙地,就乜房屋問題都解決晒啦,你哋個政府,可否有為一點呢?」

擺明「窒」。咁情況,你仲想到內地填海?真係未畀人憎死過咩!

曾智華

阿碌開咪

編按:原題為「咁好乞人憎㗎!」

最新回應

關鍵字

熱門文章