星島日報

【阿碌開咪】一屆不如一屆

2020-07-03 11:00
有云:最怕貨比貨,因一比,渣斗的立即現形! 

人比人又如何?其實若你自知水皮,低調隱形,絕對冇人會拉你出嚟與其他人比較。不過,若你選擇在公共領域(Public Area)亮相,例如:政治、官場、表演、體育……咁想唔被「人比人」,就真係「天真無牙」矣。

昨晚,舊同學聚會,當中有已經及準備退休的高官,個個縱橫官場幾十年,真係乜人乜事都見過,無不搖頭歎息,非常冇癮,因見到香港全方位質素滑落。

「阿碌,呢個世界,最怕人比人。我幾十年前初入政府,見到班大Sir,個個信心十足,叻到震。例如陳祖澤、曹廣榮、楊啟彥、陳方安生、張敏儀……英文勁,口才好,睇文件一眼到位,制定政策也效率奇高,完全知道骨節眼位置。所以,到行政局向議員做Presentation也不會口窒窒!」A佬回憶:「點解我話口窒窒?當年小弟做跟班,挽公事包坐上司身邊,哎吔吔,見到行政局開會氣氛,真係嚇到腳震㗎!」

因為早年香港行精英政治,行政局非常大權,當時一切重要政策,全由「港督會同行政局」拍板通過。港督委任入局的,位位屬各行各業頂班人馬。例如滙豐大班浦偉士、太古女強人鄧蓮如、馬會主席張奧偉、大Sir鍾士元等,全部大超班馬。所以,任何高官到行政局,之前必定做足功課,以免被提問時「一劍封喉」。

A佬有幸,由上世紀八十年代做中級官,有機會旁聽行政局會議,直至過渡後,自己升正,見證一個令人搖頭轉變,正是行政會議成員的水準,一屆不如一屆。因為部分成員選擇,特首根本冇Say。於是,個別入局的,英文甚渣有,學歷不足有,目光如斗有,經驗淺薄有。咁嘅水平,又要扮晒嘢,質詢經驗豐富的高官,問埋啲淺薄問題,你係高官,個心會點?肯定嘴藐藐!喂,人性,唔服好難扮服㗎!雖然個面仍保持禮貌。

曾智華

阿碌開咪

編按:原題為「由腳震震到嘴藐藐」

最新回應

關鍵字

熱門文章