星島日報

【阿碌開咪】真經濟,假經濟

2020-07-02 07:00
的士商在疫情稍稍過後,立即撲出,摩拳擦掌準備申請加價,兼且一開波就嗌落旗加百分之六至十。

前晚飯局,有位睇市專家H揶揄:「班的士炒家,真係食飯唔知米價!」H哥指大家現在由股市見到的美國、中國及香港經濟表象,其實是假象,根本反映不到真實「慘況」,尤其美國!

眾所周知,美國經濟重創,等於全世界半癱瘓,若以股市測經濟,真係「假」得交關,因股市是用無限量印銀紙托出來的。真象又如何?一條條「衰退綫」交織出現,唔知點搞。

例如,航空業死咗大半,牽連幾廣?首先萬計機師、空姐冇工開,不少已被裁。機場一切業務大半停頓,零售冇生意,連清潔及搬行李等基本工種也不少冇埋。

大量飛機停在沙漠「曬太陽」。飛機製造及維修,乃兩大超級工程行業,又冚旗。

飛機冇得飛,旅遊業、酒店業、零售業……一條鏈咁謝晒,股市有冇反映?

美國經濟最恐怖,已知的有歷史悠久租車集團Hertz倒閉;最大的貨運公司Comcar申請破產保護;老牌百貨集團例如JC Penny紛紛唔掂;大量埠仔商場變鬼城;股神巴菲特損失慘重燒手指;巨型投資管理集團貝萊德(Blackrock)指全球經濟有災難性;美國政府創出空前負債數字;業內人士估計陸續有萬二至萬五家大型連鎖銷售店關門;難以量計的借貸(房屋及汽車等)及信用卡欠債未能清還,將變壞帳……

美國失業率未能改善,意味消費低落,欠債飆升,政府收入大減而支出(失業救濟)大升。

H哥指美國經濟就似一個快頂唔順的壓力煲,單靠印銀紙,絕不能解決即將爆出的災難。美國一爆,全世間現在的經濟領域,豈還有樂土?特朗普水深火熱,必轉移視綫爭連任總統,勢必加料「妖魔化」中國。所以,未來四個月,肯定雞犬不寧,香港人當難獨善其身。快快查查自己條安全帶個扣有冇問題!

曾智華

阿碌開咪

最新回應

關鍵字

熱門文章