星島日報

【阿碌開咪】談公屋租金檢討 只有道理色

2020-07-01 08:45
香港,愈來愈政治化,一切日常公共事務,皆變為「有立場,冇公理」,所以,好難與任何人冷靜講道理,因一講,班無聊友就會同你「上顏色」,奇在部分受過高深教育及有不少人生經驗豐富者,過去一年都似「撞邪」,總之,看人看事,無「顏色」不歡,吹乒乓。

更㷫斗,各路白癡友久不久問:「Luke Sir,你係乜顏色?」「乜顏色都冇,只有道理色!」真係拗都嘥氣。

另外,班政客議員也是幾乎清一色「只講選票,不講邏輯」。有選票?就黑變白!冇選票,就白變黑!

我講緊乜呢?正是講「公屋租金檢討」。

香港因有二百多萬人住在公屋,所以對民選議員來說,正是票倉,得到佢哋歡心,就大把票。若失去呢?當然議席危危乎,這是政治現實。於是,個個有理冇理,總之對公屋住戶有利,就飛撲支持,置社會大利益於不顧。

小弟並非政客,所以,毋須左右逢源去賺選票,只想講下「真話」。眾所周知,公屋,乃一種福利,一個由全香港納稅人夾錢畀二百多萬人得益的福利。福利,顧名思義,只應給有需要者,若不需要的也佔用,就已違反初心!

我每天晨運行經幾大公共屋邨停車場,見到不少富戶又平治又寶馬,真真火滾!

好嘞,今年政府已代公共屋邨住戶繳交兩個月租(外邊租樓的貧困者只口糠糠!),房署表示,計埋計埋,政府已為公共住戶節省了三點一四個月租金!

剛剛房署完成二○二○年公屋租金檢討,建議加租百分之九點六六,九月一日生效。

加租?公屋住戶贊成?當然唔會,於是無論建制及泛民政客,即撲出來「為民請命」,鬧到政府趴喺度,話之你房屋委員會面對赤字(又係納稅人畀!)。

我的看法,老弱傷殘,納稅人全津貼屋租都得。但其他公屋住戶若要求一刀切唔跟機制而又要納稅人填晒,公道嗎?對得住冇分住公屋但又納足稅的草根打工仔嗎?

曾智華

阿碌開咪

編按:原題為「我非政客,我講真話」

最新回應

關鍵字

熱門文章