星島日報

【阿碌開咪】關鍵少數聯盟

2020-06-25 10:00

近日各大政黨已在密密做功夫,為乜?當然為九月立法會選舉部署啦。尤其今次建制恍似要與泛民決一死戰,因阿爺「泰山壓頂」,一定唔可以畀泛民贏得乜乜「35++」。 

小弟晚飯時,其實冇乜興趣講政治,因影響消化也,但永遠情況變成「你唔講政治,政治想你講」,因任何話題一扯,必然去到政治。

無法啦,講咪講囉。睇今次形勢,建制、泛民真是從未如此勢均力敵。建制有無盡資源,又有阿爺撐腰,不過,你知我知,真係人才不足,觀眾緣亦唔多夠,好在「鐵票」勁抽,以及配票功力非比尋常,呢方面,「一盤散沙」般的泛民,真係冇得揮。

但泛民勝在經常有黃金比例(六比四)頂住,一去到直選議席,多數贏條馬頸。今番客觀形勢,更因去年的政治運動帶來「紅利」,雖則不少大將可能被DQ(預咗啦),但選民多只認招牌唔認人。不過,今天至九月,仍有兩個幾月,「政治一日都嫌長」,可能仍有好多變數也。

人人講建制及泛民,呢,我就非常關注自由黨前主席田北俊搞乜嘞。

田少乃政治老手,做過政黨主席,曾受北京寵信,又走過直選,如今七十三歲,你叫佢再上前綫,當然唔制,但似曾鈺成及周梁淑怡等,仍非常精壯,對觀察政局亦有個人智慧,點會忍手忍口乜都唔理唔搞?

於是繼續發揮影響力,暫時推出李啟迪、袁彌昌及潘焯鴻三隻「馬」跑。

昨晚與政界老手「大T」摸酒杯底。小弟問:「T哥,呢個局點睇?」

「阿碌,今屆選舉,建制及泛民皆不會取得壓倒性勝利。『老薑』田少早早睇通,決定要搞『關鍵少數聯盟』。只要加埋有五票,就可以左右大局。任何一方,包括中央、政府、建制、泛民,想在立法會通過任何法案,都要『求』佢哋!呢個聯盟,一定不可在政治上有鮮明立場。如此,他日倒向邊一邊,也可自圓其說,地位超然,人人要『拜』㗎,哈哈哈!」

曾智華

阿碌開咪

最新回應

熱門文章