阿碌開咪｜窒我？照咗鏡未？

一位資深香港會會員，傳來該會男洗手間牆上漫畫，兩個Bar友在吹水。　

A：Have you ever doubted the integrity of the British government？

B：No！I've always been quite sure that they haven't got any！

記住，香港會是一家極度傳統英式的會所！

點解傳此漫畫？因之前我傳咗條英國國會片段畀佢！內里首相約翰遜態度輕佻，挨着講台，側側身窒一位攻擊佢的議員。「肥仔遜」呢輪畀反對黨鋤到失暈，咬住佢防疫期間犯例開派對，上綱上綫指冇誠信，要立即下台！

長期留意英國政壇者，必知英國有百計國會議員。優雅的紳士淑女固然有，但也有不少陰濕、蠱惑、貪婪、好色……甚至賤格（非常到肉形容）議員，幹着這樣那樣不見得光的勾當。但個個一入到國會，必定西裝骨骨，發言大義凜然，恍似有光環在頭頂。

過去兩星期，呢班人捉到約翰遜痛腳，當然飛身鋤落去，欲置佢於死地，以賺取政治紅利。

不過，老狐狸「肥仔遜」豈會咁易被擊倒？只等黃金機會出現，就即一劍封喉還招。

終於，機會到！

反對黨議員Sir Ed Davey加入開火砌約翰遜，逼佢下台。點知「肥仔遜」早早胸有成竹，語帶輕藐立即反窒，搞到Davey搵窿捐！因呢丁友著名濫收唔多見得光的政治獻金，醜行早被英國特務機構軍情六處詳盡記錄。約翰遜當然掌握其黑材料，於是回應Davey攻擊時略略「亮劍」，已嚇到對方瀨尿兼N咁多傳媒追尋Davey仲有乜衰野。

條片在「BBC Politics on Twitter」，大家可以原汁原味睇到，真的精采。

約翰遜回敬一記狠招，能否頂住反對黨狂攻？未知，只知好戲必定繼續上演。

曾智華

 

阿碌開咪