星島日報

【金融High Tea】股民預備硬食美式七傷拳

2020-05-29 08:45

  美股接連第二晚大升,杜指爆上553點,港股收市跌168點,兩地股市差距再拉闊近700點,由宣佈制訂港版《國安法》至今,杜指同恒指拉開咗近2700點,呢個係立法至今產生嘅本地股市折讓。以杜指25548點計,比恒指的23132點高出2416點,是少見的差幅。

  新冠肺炎在美國大爆發後,美股一度插到18591點,比恒指低逾2000點。如今香港經濟受疫情衝擊無美國咁嚴重,兩者差距主要由本地政治局面動盪引致,不過,由於美國國務卿蓬佩奧暗示香港獨立關稅區地位成疑,港股噚日跌百幾點已經比想像中好。

關稅地位或不保算跌得少

  政治市無得估,因為當中涉及人嘅因素,所謂一念天堂,一念地獄。人大宣佈訂立港版《國安法》,決定應該深思熟慮,唔會因為美國反制就叫停,美國要撤銷香港獨立關稅區地位,以至限制對港高科技產品出口,港人都只能硬食。美國要極限施壓,中方肯定會奉陪,係一個大撼大嘅格局。有中環茶友問,取消香港獨立關稅區已經唔係小事,有人仲搵番當年「財經健筆」話,香港實施聯繫匯率要美國同意,係咪真呢?

        過去,香港行聯繫匯率有照會美國,但財經健筆嘅講法已係那些年。九八年亞洲金融風暴,大鱷狙擊港元,美國無出來照保。香港實施聯繫匯率制度,都係靠自己按收入一美元就發等值一美元即7.8港元現鈔,無所謂美國批准與否。當然,如果美國要搞香港,話唔准香港掛靠美元,自然會產生衝擊,美國係金融霸權,想點都得。全世界好多交易用美元結算,美國透過美元長臂管治,的確係無遠弗屆。

內銀逆升 領展一碌再碌

  不過,美國如果去到咁盡打殘聯匯,港元唯有同人民幣掛鈎,歐洲同其他國家的港元資產無得換番美元,咁咪去問白宮囉!經此一役,各國都會明白用美元結算的風險,必然會追求更多元化嘅交易配置,人民幣是否又可以乘機走出去呢?財經健筆之說唔可以話錯,但就偏向誇大美元霸權嘅殺傷力,無講到呢個七傷拳,殺敵一萬,自傷五千,仲搞到盟友要陪埋一齊去死。

  中美角力,有人要將戰場搬嚟香港,令本地投資風險大增,呢個無奈嘅現實,港股再喺成交達到1327億元下,逆外圍升勢下挫,顯示背後大撼大嘅角力,沽壓仍然唔輕。美英股市都炒疫情好轉,香港股民成為成為「蜑家雞」,見水無得飲。現時外電話美方考慮制裁中方實施「港區國安法」嘅官員,同時分階段對香港嘅獨立關稅區設限,可以估計中方唔會因此讓步。相反,北京可能會考慮用其他挺港措施去撐住香港,或者因為呢個原因,所以好多人以為美國國務卿蓬佩奧發聲明話要改變香港嘅獨立關稅區地位後,港股會天崩地裂,結果恒指最多雖然跌逾400點,但尾市又撐返上嚟,令跌幅收窄只跌168點,內銀股仲成為跌市奇葩,農行(1288)升2.6%收報3.15元;郵儲行(1658)揚2.5%收報4.93元;建行(939)升1.5%收報6.18元;招行(3968)彈1.25%收報36.35元;工行(1398)升0.8%收報5.03元。

  相反,地產股就比較傷,有大量收租物業的太古A(019)、領展(823)、港鐵(066)齊創1年新低。政府宣佈揭標嘅鴨脷洲地由大昌地產(088)投得,大昌在行內出名落價審慎,呢次以「死雞價」投到官地,唔係其他地產商無錢,而係大家喺現時環境都寧願留番個錢暖袋,咁樣算係好兆頭,所以大昌執到平地,股價噚日都要跟市微跌,報0.6%,報4.89元。

  領展1年高位係99.8元,管理層喺高位食胡減持,噚日該股收市急挫3%,報收57元,比高價低近40%。領展現價息率4.76厘,高位時不足3厘,當時若然計內部回報率,以房託計其實唔算吸引,只不過大家慣性睇好,結果股價係有買貴無買錯之聲中回落,現時再遇本地不利環境,搞到股價一碌再碌。

陸羽仁

原文刊於《頭條日報》

最新回應

熱門文章