星島日報

【阿碌開咪】重要投資訊號?

2020-05-20 13:30

  香港人,十之八九有各式各樣投資,包括物業、車位、外幣、期貨、黃金、債券……當然,最普遍為股票。

  小弟二十五歲開始學人買賣股票,頭二十年,簡直是血迹斑斑,不但「贏粒糖輸間廠」,更有幾隻先變仙股,再變「牆紙」,交學費交到儍。

  直至五十歲,突然有份財經周刊請我寫「每周投資」,哈哈哈,你出得起稿費,我當然唔拘,一於化個名扮「財經評論員」可也,新鮮又有趣。

  性格使然,一係唔寫,一寫,當然唔衰得,首先花大量時間研究各位大師(例如巴菲特、索羅斯、曹仁超……)的投資理論。此外,凡推介任何上市公司,皆事先做大量資料蒐集,再作分析,包括其競爭實力、市場前景、行業大勢、派息政策、管理層陣容、董事局誠信……結果,天助自助之人,就此,很快已將前二十年的「失血」賺回,稿費並夠津貼「肥女B」及「排骨B」到外地讀書!

  其實投資股票一定要冷靜理性,兼且必須留意幾種訊號。例如「誠哥買野你要跟,誠哥出貨你咪接」(大家問問兩年前買咗中環中心單位的「苦主」就知嘞,幾乎摸頂接貨!再一次印證李嘉誠睇市,何其精準)。

  又例如「應跌不跌」,乃買入訊號。市場唔會死錯人,應跌的股票唔跌,反而倒升,兼且是大藍籌,你就要跟進研究!因為必定有你掌握不到的原因在背後。

  上周五財經版,全部頭條為——長實發盈警,預期上半年盈利大跌。主席李澤鉅表示,由於酒店業務及英國酒吧收益錄得負數,以及所持房地產信託權益市值大跌,盈利將大幅下滑。是否非常壞消息?當然係!但睇睇股價,上周五完全唔郁,去到周一上午,更竟倒升!

  利申,我是持有長實的。點解?因見過去幾個月,李嘉誠父子不斷在五十元左右回購增持,故按「超人買野你要跟」定律入貨。今番,發盈警竟然倒升,肯定是「重要投資訊號」!

曾智華 

最新回應

熱門文章