星島日報

【阿碌開咪】派消費券遠勝齋減租

2020-10-15 11:00
N年前,訪問一位權威經濟學者C教授,佢話:「阿碌,睇一個政府的財金官員及一個大集團的CEO有冇料到,簡單,前者要睇佢有乜招數刺激經濟,後者則睇佢點為集團追求最高利潤!」

C教授在香港極有名氣,勝在佢無求於人,最重要,又唔使自己落水做,所以,餐餐可以放膽批評。

「近幾年,財金官員凡到《財政預算案》公布時,提出的刺激經濟方案,多為派糖,不過,並非真派,而是減差餉、減公屋租之類,這個,前者益晒大業主有錢佬,後者益晒住公屋三百萬人,對刺激經濟加強就業,有乜好處呢?冇乜喎!其實最佳方法,係唔減差餉、唔減公屋租金,將同一筆錢,以消費券形式派出去。全港市民,人人有分,最重要,指定只可在本土消費。咁呢,立即有百億現金湧入市場,帶旺所有零售、飲食、旅遊、服務……業,打出一條龐大消費鏈,從而製造出萬計工作崗位,咁先算搞活經濟!」

各位,大家認為是否有道理呢?「另外,大集團年薪千萬元請個CEO回來,理所當然要求佢增加公司利潤。冇料CEO最快做出效果交數的,就是炒人,炒炒炒!其實這是非常消極又冇料到的方法,不但降低人力資源及整體工作效率,更重要壞士氣!留下的職員,見到公司如此無情,自己份工又冇安全感,豈會對公司忠心而奮力工作?有料CEO必定不會如此低手。反之,會想盡新方法開源,開新市場,構思新產品,多規劃與其他機構合縱連橫,互相借力谷大盈利!」

最近,不少大商場谷人流,也是大派消費券,令所有商戶生意大增,呢招是否遠比減租高明?連馬會最近也出呢招,每位會員派一千元消費券,在會所內任用。

香港房屋協會同樣,所有屋邨居民派一百蚊現金券,指定在屋邨內商場消費,鼓勵多多幫襯自己商戶。呢招正是「荷包兜肚」,自己居民益番自家商戶,這是否遠比齋減租高招呢?

曾智華

阿碌開咪

編按原題為「消費券荷包兜肚」

最新回應

熱門文章