星島日報

【阿碌開咪】「拍紙簿」離職之謎

2020-10-02 11:00
誰是「拍紙簿」?西九管理局行政總裁栢志高(Duncan Pescod)是也。佢雖然是英國人,但香港長大,正宗「香港仔」,一九八一年考入政府,出任政務官,乃「AO精」(即精於做官之道也 )。

周二下午,官場奔走相告,因傳出栢志高「被辭職」,原本合約到明年八月才滿的,竟然「被要求請辭」,需要十一月底拜拜。

情況非常之不尋常,立即飛電問官場綫人「猛料H」,究竟發生乜事?到執筆此刻,仍未知真正原因。

事件極不尋常,包括:一、栢志高為官幾十年,深懂生存之道,退休後改任西九行政總裁,亦公職也,冇乜理由做唔掂而要「被辭職」的,與佢的功力不符;二、栢志高在任政府時,亦曾與西九主席唐英年拍檔,從未出問題。而「唐唐」絕不是會炒人的「滅絕師叔」,做人留餘地,主意應非來自佢。咁來自邊個?要做到咁「冇面畀」呢?三、究竟有乜嘢咁急,要栢志高非立即起身不可?

N咁多疑問,睇睇稍後能否查明。

H哥透露兩件有關栢志高冧上司的絕招趣聞。

一、栢志高二○○六年出任布魯塞爾特派代表,遊走歐洲宣傳香港。某年,「煲呔」曾蔭權到歐洲開會,「拍子簿」深知老闆為虔誠天主教徒,一定發夢都想見到教宗。結果,多番奔走,畀佢搞掂,圓了「煲呔」一個夢。有人笑佢「擦鞋大王」,但事實,有咗呢項非公務的「功績」,你話唔升級升到嘭嘭聲就奇啦。

二、栢志高雖為英國人,但對「服侍」上司的細心及謙卑,遠比不少華人同事犀利。佢掌握個個上司都喜歡耍官威,重視被下屬「尊敬」心理,所以,有一絕招贏盡平排同事。就是凡出Trip,安排妥貼上司開會細節後,翌日晨早,會站在上司酒店房門等,以便陪同波士到會場,貼身服務。

其他公務員會點做?十個十個都只在酒店大堂等老細。「拍紙簿」一招「企門口」,又贏晒!

曾智華

阿碌開咪

最新回應

關鍵字

熱門文章