星島日報

【阿碌開咪】閒錢全瞓抽iBond

2020-09-25 11:00
「年紀一日一日漸長,搞搞下變『耆英』,對身邊錢的處理,必須謹慎!」

以上是我對身邊所有退休老友的真誠忠告。因為六十歲以上退休打工仔,肯定無復當年之用,已經冇本錢跌低再爬番起身,所以,任何高風險動作(投資及運動),要一概戒絕。

若咁大個人仍儍下儍下信「買得大贏得大」或「高風險高回報」,咁等於撼頭埋牆矣。退休老友們凡問小弟應投資乜,皆答曰:「冇得蝕者,綁得幾多得幾多,以防自己揸住閒錢,心癢手痕,又或畀各類投資顧問(忠奸不分,總之目標係賺你錢!)????你買乜買物,蝕鬼晒。」

「咁即係乜?」

「第一,政府年金。有幾多,買幾多,綁住最大筆,一於養自己養到離世一天。短命冇問題,最驚太長命!有咗份年金,有個堅穩基本保障;第二,凡見政府出債券就買。夠年紀,若有『銀色債券』,即瞓落去,賺多點息。就算是人人可買的iBond,亦將閒錢全投,有幾多投幾多。」我實牙實齒答。

「喂,碌Sir,iBond就快可申請,但利息奀過鬼,可能得一厘咋!」

「買iBond,最重要:一、保本;二、安全;三、必賺;四、自由買賣;五、利息比銀行定存高。老友,請問有乜投資齊晒以上五大特點?」

「買藍籌股票有四厘息喎!」

「過去一年,十隻股票跌咗九隻。幾千隻股票之中,跑贏大市只得十隻八隻,比例低得驚人。即係你平均買都輸到瞓街!唔係叫大家唔好買,只想話對退休人士來講,股票絕不安全。『棺材本』放在此,隨時冇咗大截!」

投資者,通常死在邊?係人都識講,死在貪心及無知。不過,奇在個個識講,但個個貪,投資前又唔做功課。最弊,似馬迷——善忘,即永遠唔會累積蝕錢經驗,結果不停重蹈覆轍,輸完一次又一次。買iBond只賺不蝕,事實世上根本絕無呢種蛤乸,簡直是政府派錢,閒錢唔瞓晒落去投就笨。

曾智華

阿碌開咪

最新回應

關鍵字

熱門文章