星島日報

【阿碌開咪】建制派翻身大法

2020-09-14 11:00
  打開手機,撳下撳下,撳出一張相。嘩,成棚二十幾人,個個是熟口熟面立法會議員,標題為《建制派研究報告:我們要重整旗鼓!》,另有副題《香港需要怎麼樣的建制派?》。 

 呢個《建制派研究報告》,大家當然冇得睇啦。不過,似小弟呢類觀察本土政治幾十年者,作都作到個出嚟啦,因一切現象來龍去脈因因果果,全部有迹可尋、有脈可跟也。

  事實建制派自己亦深知,真係必須「重整旗鼓」,因為去年底區議會選舉大敗,已經聞到陣陣????味。

  大數據顯示(唔好問我邊度睇到),今年若如期舉行立法會選舉,慘矣,建制派將輸得極難睇,此乃主觀與客觀因素及形勢配合,所以,政府因「疫情嚴峻」而延遲選舉最少一年,正好為佢哋Buy Time,思考點救崩瀉的民意。

  一個人,唔會無緣無故生病,一個政治同盟,也不會無緣無故失去支持,所以,一定要查找原因,再對症下藥。這就是建制派急急希望的「重整旗鼓」嘞。

  其實做建制派看似好鬼易,因中央權力錫晒,特區政府就晒。總之,一切「合法的」有利因素,畀晒你(例如大量資源供應,公職位可以表現的,也幾乎全落建制派手)。

  但是世界冇免費午餐!你必要與政府捆綁在一起,「榮辱與共」!特首民望低,政府支持沉,冇法,攬住落可也。

  所以,小弟看,當前急務要一年內翻身,建制派必須與政府的公信力分拆(Decoupling),建立一個(看似)敢於向政府,甚至中央(先有默契地打晒招呼,一齊「演出」啦)Say No的形象。包括強調搞清是非黑白、擁有獨立思考、支持普世價值,絕非甚麼舉手機器及政治花瓶!兼且願為香港長遠落實民主(可以唔知幾長)普選而打拼。

  做(扮?)得幾多得幾多,並且換換血,畀人一點點新鮮及朝氣勃勃感覺。

  係呀,難做兼好大技巧㗎,但有機會搶番三兩成民意,頂住先!

曾智華

阿碌開咪

最新回應

關鍵字

熱門文章