星島日報

【阿碌開咪】是精明?是懵炳?

2020-09-07 11:00
  上周五早上六點,照舊夾大疊報章到茶記,開始「晨光第一歎」!享受兩小時讀報樂趣。循例先快速瞄瞄各大報章新聞版頭條。

  打開《星島日報》A1,咦?…唔係啩?大字標題:《農夫山泉奪港史「凍資王」,超購1100倍,涉款逾6424億,破中鐵建紀錄》。

  哈,呢個現象正是「匪夷所思」典型範例。

  誤打誤撞,小弟近年成為不少人「投資明燈」,所以,經常被問這樣那樣應否去馬。

  兩周前,N位老友問:「碌Sir,農夫山泉即將上市,睇個勢好似好勁,應否瞓落去借盡孖展博一博?」

  對農夫山泉,我真的無研究之至,但過去十多年不停遊歷內地,也多次買來飲,反正樽裝水全部價錢相若,見佢標榜「山泉」,咪飲之囉。

  好啦,講到投資價值,既然老友問到,我就用「教學相長」手法,問番佢哋,大家既然對呢隻股咁有興趣,申請前,請答我四個問題:一、全世界都出蒸餾水、礦泉水,歐洲各國、澳洲、紐西蘭、美國、加拿大……全部都出,連內地也有N咁多牌子,門檻如此低,爭到打崩頭,農夫山泉有乜過人優勢?二、若果優勢並不明顯,咁,有乜驚人的盈利前景可言呢?三、如今摩拳擦掌認購的,是受宣傳誤導的蟻民,抑或真真正正有分析能力的精明投資者呢?四、既然認購咁洶湧,重本之下,抽到機會有幾大?獲利比率有幾高?會否搞到成身汗得個桔呢?拋出四大疑問,大家應知小弟根本冇興趣。

  結果,開啊!無厘頭,又唔係阿里巴巴或騰訊級數賣未來科技概念及「國家概念」,點可能凍結六千四百二十四億元?

  再睇睇,申請一手中籤率為百分之四點五機會,投資六百五十一萬元認購三十萬股,才可穩得四手(八百股),你話幾鬼荒謬?

  老友,乜乜「凍資王」,以前冠軍為中鐵建,亞軍為閱文,唔該睇睇佢哋上市後,股價有乜驕人表現,你就知瞓落「凍資王」的,精明、懵炳兩不分也。

曾智華

阿碌開咪

最新回應

關鍵字

熱門文章