星島日報

【阿碌開咪】相格隨心變變變

2020-09-03 11:00
前日早上,手機彈出一幅相,老友「大B」問:「喂,碌Sir,認唔認得佢係邊個呀?」

一睇,唔……好面善,呢位阿伯邊個呢?瘦到乾晒,毫無神采,但竟在演講!

諗咗三分鐘,即上網Check Check心目中人物是否佢。哎吔,果然中!正是剛剛七十歲的前「萬人迷」馬英九。如今……慘,走晒樣!

仍記得十二年前,佢選台灣總統,我哋成群傳媒老友湧過去觀戰。當時「九哥」簡直魅力沒法擋,所到之處,例必萬人空巷,尖叫之聲不絕。團中有位女高官「R姐」,工作時英明神武,運籌帷幄,想不到在夜市中見到馬英九,立即變小粉絲,狂追住又合照,又簽名,高興到彈起。

十二年過去,「九哥」由天撻落地,雖冇落地獄,但已由「萬人迷」變「N人厭」。不是無緣無故,大家睇睇佢任總統的表現就明。

如今的馬英九,整個外形及相格變晒,不但唔靚仔,反之,有點陰沉殭屍款,少少恐怖。

有云:相由心生。其實相格亦會隨一個人的環境及際遇而變,有的變美,有的變醜,有的變祥和,有的變蠱惑。小弟行走傳媒江湖四十年,見盡不少政治人物的驚人變化。

不論是建制或泛民,不少議員入立法會前,是充滿正氣的律師、義正詞嚴的社工、單純誠懇的工會代表……但全部一入政圈,立即變變變。

可能領得蠱惑招數多,要保護自己,加上權力及金錢引誘(不一定是貪污,而是被人「合法地照顧」),更由無權無勇變個個高官要「巴結」你(正所謂「乞票」是也),怎不飄飄然?部分更有水鬼升城隍的心態。

於是小弟就見證一個又一個政壇人物,由充滿理想及正義感慢慢「淪落」。首先,強調所謂「策略性處事」(即放棄原則),然後,為政治利益埋堆。個別本來生活儉樸的,突然揸靚跑車、穿意大利西裝,肚腩發脹,相格變市儈。  權力令人腐敗,政治令人沉淪,真㗎!

曾智華

最新回應

關鍵字

熱門文章