星島日報

【阿碌開咪】想被起底剝光豬?

2020-09-02 11:00
  電視廣播上周公布中期業績,慘情,廣告收入劇跌六成九,一地血,蝕二點九三億元,不派中期息,亦預告全年都可能食白果!股價沉呀沉,得番八個幾。 

 曾幾何時,TVB年年賺大錢,肥過隻豬,股價炒到天高,派息慷慨。早年曾被視為「公用股」,有買貴,冇買錯,食息一族㖘㖘腳。

  不過,世界任何人事物,總有個循環,盛衰皆有時,可能因客觀大形勢,也可能因「成功乃失敗之母」,過分成功,不思進取,加上殺死晒對手,最後自己變「恐龍」。

  如今,這家「香港廣播霸主」弱下弱下,又賣下賣下,落到一位不見經傳、從冇經營傳播娛樂事業記錄的工程師徐敬手。打下問下,你想我哋班「傳媒老是佛」有信心就難喇。

  相信過去幾年不但「殼王」陳國強蝕到入晒肉,冇晒心機,其他股東,包括台灣女富商王雪紅及「中國梅鐸」黎瑞剛都半投降。

  今番殺出個徐敬,究竟點解肯重錘落疊,真頭,因佢對記者根本講不出甚麼藍圖發展,只表示乃經朋友介紹認識陳國強,覺得TVB有咁多年歷史,有職藝員支持,若經濟回穩,疫情受控,業績應該會好轉,希望在人間!

  覺唔覺得答案非常外行呢?

  講起希望做電視大亨,小弟也有個故事。話說十多年前,亞洲電視賣盤,叫價二十六億元,遇啱中國經濟起飛,出現無數新崛起大富豪,不少覺得二十六個億「濕濕碎」,紛紛有興趣出價。

  其中一位搵我問意見,小弟實不相瞞:「D總,做電視台老闆,看似好風光,日日見報,大把明星藝員黐埋嚟。不過,燒錢燒到喊,根本冇機會翻本。你咁多錢,蝕十個八個億,不是問題。問題在,身為內地富豪,買香港電視台,一定比狗仔隊『剝光豬』,全面起你底,爆你啲財富邊度嚟。另外,查埋有冇小二小三。總之,將你『陽光測試』喇!」聽完,佢即縮。日後TVB新老闆徐敬際遇又如何,祝佢好運可也。

曾智華

阿碌開咪

最新回應

關鍵字

熱門文章