星島日報

【阿碌開咪】總統、夫人、班底

2020-08-27 11:00
美國總統選舉之戰,隨着拜登正式接受提名,開始進入直路,兩個候選人要埋身肉搏了。  

向前看,九、十兩個月,選情將會瞬息萬變。拜登陣營有乜招數較易估。但特朗普呢丁狂人,道德、品味、操守……毫無底綫,唔知會出乜牌,尤其發起爛渣上嚟,乜怪亂招都會出。佢絕對做得出攬住對手跳崖(攬炒?),來招金庸武俠小說的「天地同壽」。

難估的,無謂估,當睇戲好了。

可以推斷的,是正路總統選舉賽,想贏,要三大支柱皆亮麗,包括候選人、佢夫人及其班底。

這方面,拜登起碼贏硬兩項。論候選人本身,拜登輸一個字——老!七十七歲,當然活力不再,又冇特朗普那種Burning Desire,做乜都有熊熊烈燄,唔打得都嚇得。尤其對國際上的對頭人,心狠手辣,怪招無窮,頗得教育水平較低的白人及心態「美國大晒」者追捧,呢兩類人絕對唔接受國家做「世界二哥」,所以,邊個有威脅,心態上就打殘佢。這方面,狂特勝出。

但美國立國二百多年,總有極多價值觀,為大部分美國人珍惜及堅持的。尤其一向引以為傲的軟實力,以及宗教及家庭的傳統仁愛及溫情觀念,這方面,總統冇乜時間處理,多由第一夫人孭起。

奧巴馬能夠勝任總統,人人都知因有賢內助米歇爾幫佢做晒大後方的軟性工作,尤其慈善及社會服務等親善工作,這個極受婦女歡迎。

好嘞,到咗特朗普時期又如何?點講,梅拉尼婭都有種冷冰冰的隔膜感,扣晒分。

所以,上周拜登一推老婆大人吉爾出場助選,立即在形象上贏到開巷,因百分百美國人認定的「第一夫人」形象,就應是如此也。

最後一瓣,講班底。選拜登,即選埋非常能幹的副總統賀錦麗,智囊則有前總統奧巴馬、前第一夫人米歇爾奧巴馬、議長佩洛西、紐約州長科莫……等,粒粒皆星。相比特朗普班底有點「蛇鼠一窩」之感,形象及實力皆贏晒。

曾智華

阿碌開咪

最新回應

關鍵字

熱門文章