星島日報

【阿碌開咪】一字排開勇於承擔

2020-08-26 11:00
讀過領袖學或管理學ABC者皆知,推動別人跟自己的理念去做,最下下下策,為訴諸權威,靠斥責,英文是Finger Pointing,手指指,總之你要做,唔做就係你嘅錯。

效果點?唔使高深理論,正常人性反應,除非打你工收你錢,咁……咪做囉。否則若我有判斷能力,思想自由,一定會問清問楚:「點解要做先?」

沒有無緣無故的懷疑論、陰謀論。

正常人,會否不停懷疑一個處事光明磊落、有長遠品格記錄的君子?除非變態,當然唔會!因為一個人的公信,有客觀論定。

同理,若有大量市民唔信林鄭月娥,提出質疑,甚至轉化成陰謀論,當然有其背景原因。

最佳拆解,是開心見誠,自己先反省檢討,然後心平氣和(死忍都要㗎喇),耐心向市民逐點解釋,咁就算不能化解所有不滿,起碼說服到一個就一個,盡咗力後,問心無愧。

但,慘情,林鄭政府面對眾多疑問及反對聲音,竟然不用先包容、後化解方法,而用最差的一種策略,正是Finger Pointing。

由林鄭到陳肇始,全部跳出來指責市民用陰謀及偏見去抹黑整個檢測計畫。陳茂波更呼籲市民「勇於承擔」(嘩!講到好似「天將降大任於斯人」咁款,太言重了),令人……

我昨天飲早茶,就聽見隔籬兩位阿伯窒「波叔」:「條陳茂波,猛叫人勇於承擔,但係至今都未見成個管理機器企晒出嚟,一字排開率先承擔噃,淨係識得諉過他人大隻講!」

真真一矢中的!又係領袖學管理學ABC,任何理念,你想推行,必定要身先士卒,自己先落水,以示有百分百信心。

所以,與其手指指罵人偏見及陰謀,最佳應對,和顏悅色解釋外,講多無謂,整個政府高層,由特首再到所有處長級,加埋行政會議成員及建制派議員,在全球記者見證下,先來次「萬眾一心」做檢測,作示範。咁,起碼消減一半反對聲音。

曾智華

阿碌開咪

最新回應

關鍵字

熱門文章