星島日報

【阿碌開咪】絕不妥協怎談民主

2020-08-25 11:00
搞政治,有很多永恆皆準的道理,數百年前已傳承下來,一次又一次驗證。其中兩項為:一、政治是妥協的藝術;二、團結就是力量(United we stand, divided we fall)。

兩樣都唔識,又唔接受,咁你真係唔知搞緊邊科政治矣。

政治最「乞人憎」之處,為個個都認為自己一套啱晒,人哋就錯晒。喂!冇咁簡單呀?

你要講民主,首先要學懂包容、理解、接受,以及一項舉世準則——我未必(唔)同意你,但我會誓死捍衛你的發言權。你話特區政府及北京有意好、冇意好,總之,拋出個立法會因疫情延續最少一年決定,立時搞到泛民四分五裂(好多人笑咳)。

睇睇各個媒介,尤其網上辯論(似鬧交多啲),真係好難分辨某啲人在胡亂情緒發泄,搞亂檔拆民主台,定在真正誠心去推動香港民主發展。

自己以為爬咗上道德高地四圍喝罵別人者,最為討厭,亦最無資格講民主,因為在民主光譜之內,冇人完美。若你粗聲大氣,肆意踩人就以為等於啱晒,效果正是剛剛相反,其實你正在搞唯我獨尊。你一步都唔讓,一點都唔妥協,咁若其他團體又一樣,成個世界咪散晒?這又是否你從政的初心?太自私了。搞政治,必須說服大部分人接受自己的理念,咁,首先要別人感到舒服。靠鬧、靠詆毁對方,一世都唔會成功的,明唔明?

策略上,泛民議員可以玩留,也可以玩「反枱」,兩者皆有其道理。但最重要,仍是同路人先尋求共識,再爭取香港市民的最大公約數支持,這才是民主!

形勢不利時,可能要策略性讓一讓、忍一忍。有如跑馬,一味開閘死衝的,必中途腳軟入彎墮後,輸硬,跑不同途程應用不同策略。泛民陣營必須坐下,開放胸懷傾掂佢,然後一二三全部同心去馬。

再講一次,任何人以為自己啱晒、別人錯晒,唔該夾開食,咪話自己在推動民主!

曾智華

阿碌開咪

最新回應

關鍵字

熱門文章