祥哥睇好

馬明搭紅姐成為今年視帝及視后
祥哥睇好 馬明搭紅姐成為今年視帝及視后

三屆視帝黎耀祥為咗出外見識吓,去年5月同TVB轉簽部頭合約。雖然唔再係TVB「親生仔」,但祥仔第一部內地古裝劇《鳳弈》依然獲TVB安排喺台慶月播出。因為無份角逐視帝,祥仔冷眼觀戰,分析得更加獨到和精準,憑他智慧拆解,今年台慶的視帝視后,七成機會落喺馬國明同惠英紅手上:「觀眾眼中嘅馬明係天然呆,喺《白色強人》演醫生真係好啱好著數;至於小紅姐論資排輩,論實力一定冇人敢同佢爭!」採訪:方騫平

笑談男二

黎耀祥笑談做男二好處多籮籮,休息又夠,捱得唔辛苦,準備又充足,主角拍到攰先到他埋位拍,好似打拳咁,他梗係贏啦。
笑談男二 黎耀祥笑談做男二好處多籮籮,休息又夠,捱得唔辛苦,準備又充足,主角拍到攰先到他埋位拍,好似打拳咁,他梗係贏啦。
睇好馬明

馬國明同唐詩詠喺《白色強人》嗰段情,觀眾睇得好投入。
睇好馬明 馬國明同唐詩詠喺《白色強人》嗰段情,觀眾睇得好投入。

有情有義的黎耀祥為撐昔日合作過《西遊記》及《巾幗梟雄》系列的編審張華標,答應北上演由標哥編劇的內地古裝劇《鳳弈》,仲唔介意做男二,畀徐正溪(即周麗淇前男友徐正曦)擔正。由三屆視帝「降呢」,祥仔竟唔覺係屈就:「我年紀大啲,成熟啲,唔似得有啲後生咁囂張,勝利沖昏頭腦自以為是,老實講,我一生人做主角只係近十年八載嘅事,做路人甲同埋男配反而做咗咁多年,我係唔會有做大明星嘅感覺,或者將自己擺喺主角嘅位置,係我眼中界定作為演員,無論係乜位置,就算係客串,只要做好個角色就經已好滿足,否則根本捱唔到廿幾年,應該好快會放棄。而且大家要清楚釐定配角崗位,其實係配戲畀人,每次演出都一定起發揮作用。」






遺憾雯女演唔到
就算今次做男二,但祥仔好有戲做,非常搶戲:「朗坤呢個角色似係囂張跋扈嘅奸臣,其實只係想喺宮中鞏固實力嚟保護皇后,因為佢哋有份細水長流純純嘅愛,關係微妙,感情變化比《巾幗》、《義海》更多。因為《鳳弈》係《巾幗》系列嘅延續,標哥有打過鄧萃雯主意做皇后,但中間有問題傾唔成,都有小小遺憾。計落我喺《無雙譜》後5年冇拍過古裝劇,哈!我都唔太接受自己古裝個樣。唯一有趣係古裝劇唔實在,唔使交待角色背景,會有好多嘢玩。」

好多交流

祥仔和「皇后」曹晞文有好多感情交流戲。
好多交流 祥仔和「皇后」曹晞文有好多感情交流戲。
感情好好

內地演員徐正溪(即周麗淇前男友徐正曦)為祥仔慶生。
感情好好 內地演員徐正溪(即周麗淇前男友徐正曦)為祥仔慶生。

欣賞馬明好乖仔
今年TVB將台慶頒獎禮押後到明年1月才舉行,暫時祥仔冇劇角逐,可以喺零壓力下考吓眼光。他先利申:「因為好多戲跟唔足,只能客觀地去估計加小小人情分嚟推斷,計我分析馬國明拎視帝機會最大,佢個人老老實實、呆呆笨笨,喺《白色強人》度做啱咗角色,成日覺得演員係要配合角色外型同感覺,觀眾先會投入到,喺病人視覺,醫生唔會古靈精怪,依牙鬆槓,搞搞震,馬明嘅呆笨就變成佢演醫生嘅沉實能力。(係咪個個小生都攞過晒,排隊都應該輪到佢?)TVB又唔係對佢唔公平嘅,其實競選都要講吓運氣,正如唔係年年港姐都好靚。馬明唔好彩,年年遇到強敵,強攻黃秋生、黃子華邊個都死啦。不過,我唔使鼓勵佢加油,因為佢一啲都唔落寞,以往佢好乖仔唔花費,哈!依家我望到佢轉晒新車呀,又住太古城,我都睇你哋爆料咋。」





山聰浩信機會微
至於陳山聰被視為黑馬,祥仔坦言:「雖然佢喺《金宵大廈》人氣好爆,係貫穿成套劇嘅主角,但單元劇好多,演出上少咗個優勢,佢同李施嬅喺呢方面都比較輸蝕。王浩信嘅《解決師》迴響又唔算太大。在公在私,客觀評論,馬明機會最大。視后點都係畀小紅姐,雖然佢唔係親生女,但佢會同TVB再拍㗎嘛,而且𠵱家市場唔同咗,個圈擴闊好多,自己人愈嚟愈少,尤其有資歷嘅自己人,吓吓簽到10年先係自己人咁就死梗喇。」

常去探仔

黎耀祥好注重家庭生活,現時同無綫轉簽部頭合約,可以經常去美國探仔。
常去探仔 黎耀祥好注重家庭生活,現時同無綫轉簽部頭合約,可以經常去美國探仔。
小紅姐Win

影后小紅姐《鐵探》一出,視后一定係嚢中物。
小紅姐Win 影后小紅姐《鐵探》一出,視后一定係嚢中物。
單元蝕章

陳山聰、李施嬅主演嘅《金宵大廈》雖然好爆,但當中單元劇太多,呢方面都比較輸蝕。
單元蝕章 陳山聰、李施嬅主演嘅《金宵大廈》雖然好爆,但當中單元劇太多,呢方面都比較輸蝕。
久別古裝

黎耀祥有5年冇拍過古裝劇,對上一套係《無雙譜》。
久別古裝 黎耀祥有5年冇拍過古裝劇,對上一套係《無雙譜》。
未能再續

黎耀祥和鄧萃雯演《巾幗》系列大受歡迎,可惜今次未能再續前緣。
未能再續 黎耀祥和鄧萃雯演《巾幗》系列大受歡迎,可惜今次未能再續前緣。