(星島日報報道)最近香港零售市道慘不忍睹,做生意心態差啲都未必應付得嚟。領展最近舉辦「領展商戶學堂」,今次分享以AQ擁抱挑戰,教旗下商戶企穩陣腳。

  所謂AQ即係逆境商數,領展一如以往搵嚟星級嘉賓傳授心得,今次講者就係稻香同翠華前高層鄭柏禮。雖然佢三年前因為青光眼完全失明,但係未放棄工作,憑住超過20年經驗,分析而家零售同飲食業面對嘅挑戰,而且化為機遇。佢仲教大家三個自我激勵秘訣,就係「我可以(Possible)」、「而家係最好時刻(Positive)」同埋「一切由可控出發(Practical)」。

  同場嘅「麥包」麥長青都做過餐飲、精品等生意,用演員「花無百日紅」嘅睇法教大家時常調整心態,仲講明應該要有學習心、平常心同感恩心,就可以自我激勵。相信兩個星級嘉賓嘅分享,令到商戶都有唔少得着。

  領展商戶學堂已經成立11年,開過92場講座,領展同商戶本來就互相依賴,商戶成功增值,對佢哋生意都有幫助。