(星島日報報道)香港示威活動持續半年,大量商鋪被破壞,周六、周日經常有「催淚彈放題」,嚴重打擊零售,甚至一些體育、商業宣傳活動都怕怕而被逼取消。不過,一年一度的香港財金盛事亞洲金融論壇,就鐵定在明年1月13至14日舉行,昨日更由今屆籌劃委員會主席、渣打銀行香港執行董事兼行政總裁禢惠儀,及貿發局副總裁劉會平齊齊招待傳媒界講解盛事主題及安排。韋琪好奇問,點解佢哋仲咁有信心搞咁大型活動,怕唔怕示威者到時搞事,甚至幫會場「裝修」?

  禢惠儀話呢個論壇今年已係第13屆,過往好成功,亦成為香港年度財金盛事,可以被稱為「香港達沃斯」,所以就算香港環境如何,都要堅持搞。劉會平就話其實近期貿發局好多會議及展覽都係照常舉辦,亦無出過事。大家都認為昨日市民大型示威後無出現重大衝突,希望風潮漸過,令香港財金活動回復正常。

  睇番今次論壇,請來嘉賓都好有分量,包括前美國聯儲局主席耶倫、盧森堡首相澤維爾,同埋諾貝爾經濟獎得主阿比吉特班納吉等猛人。論壇主題係重塑增長:創新、突破、共融,在香港經歷示威浩劫,以及中國面對美國貿戰打擊之下,如何重塑增長,確係當前逼在眉睫的問題。