張繼聰回應謝安琪去年入院：太太好健康

當年憑《囍帖街》橫掃樂壇頒獎禮的謝安琪（Kay）自從爆肺多次開刀，連帶歌唱事業受影響。上月Kay再有新歌《50/50》面世，但原來她去年又再開刀，今期《東周刊》獨家爆Kay去年初因重病低調緊急入院做手術。Kay的老公張繼聰昨日出席活動時，指流感犀利，出入醫院是正常，力撐太太好健康，不需擔心。

《東周刊》獨家爆Kay去年初患重病，緊急入仁安醫院做手術，但她和老公張繼聰低調不公開患病，僅身邊數名密友知情，有密友透露Kay一直擔心復發，所以休養一年多見病情穩定才復出，而Kay兩公婆也比前更恩愛及珍惜對方，更指死過翻生的Kay密鑼緊鼓復出，以圖挽回樂壇一姐地位。

張繼聰昨日出席智能電動車發布會時，被問到太太去年患重病急入院做手術一事，阿聰指太太很健康，不需擔心，又表示近幾年流感勁，太太曾患腸胃炎，近日眼爆微絲血管，而自己之前亦椎間盤突出，出入醫院是正常，指子女在該醫院出世，近日流感犀利，頭暈身㷫都去該醫院求診，並指太太無間斷出現，代表非常健康，日前出席活動時神采飛揚所以不需要擔心。阿聰感到現時身體健康重要，要活得開心，要健康飲食和多休息，指太太肺部一向差，曾中流感，咳嗽易令聲帶受損影響唱歌，身體肌肉會退化，所以她近年跟唱歌老師學另一種發聲方法，得到唱歌新樂趣。
阿聰大讚太太享受音樂

談到Kay挽回樂壇一姐地位，阿聰笑言似講到太太有「宮心計」，「我好欣賞老婆，佢喺樂壇已好好成績，要攞嘅獎已攞晒，佢唔同階段有唔同目標，亦提攜後輩。絕對冇出嚟爭或搶做第一女歌手，佢好多年前已第一，依家音樂心態係好享受，開音樂會多謝歌迷。冇諗過做天下第一，想做天下第一開心和健康。」