專訪｜林鄭靠三大力量：「我挺過去了」

（星島日報報道）林鄭月娥在二〇一七年當選特首，二〇一九年發生修例風波，現在到了任期尾聲，被問及過去五年最滿意的政策及感受，她直言，「我無乜最滿意嘅政策，我總之每一日我都係做新嘅政策。感受咪就係大起大落囉。」她着記者翻閱她任內最後一份《施政報告》中最後一章的感言，當中提到出任特首是她公務生涯內最大的榮譽，也是她人生中最大的挑戰。她說，「用內地官員嘅術語呢……就係話...我挺過咗去喇。依家內地官員成日見到我都話，『特首，你挺過去了』，真係……挺過去了。」

對於二〇一九年，林鄭月娥不諱言當時「有幾困難你應該知」，「能夠喺咁艱難、前所未有、嚴峻嘅挑戰之下，挺過去呢……係靠三樣嘢」，首先是中央支持，「中央呢番說話就係：我哋永遠都係你嘅堅強後盾，你唔使驚」；第二是她曾應承香港市民，一七年七月一日她宣誓就任，致辭曾引述《同舟之情》歌詞，「只要見到我喺你嘅身旁，我一直為你護航……呢個係對市民嘅承諾。我係好信守承諾嘅人。」

她身為兩子之母，家人的支持兼信任當然不可少，「當時二〇一九年下半年咁嘅環境，一般血氣方剛嘅人，佢唔知頭唔知路，佢可能都會懷疑阿媽，你係咪啱㗎……你做啲嘢。但嗰種係無限嘅信任，同埋默默嘅支持……咁所以呢三大嘅力量，就係撐住我，挺過去喇。」

那當時曾否覺得自己挺不下去呢？她說「唔記得了」，最艱難時「我日日都返工」；能否安睡？「瞓到覺，係因為當你問心無愧嘅時候就瞓到覺。」至於任內有否憾事？如果可重頭來過如何去做會更加好呢？她說不想回答，「因為我係一個老實人，我唔可以亂答你。」

林鄭月娥說，她挺過去之後「唔係自己好安樂咁坐喺到」，而是替香港做事，「我對香港依家係充滿信心。我從來無覺得香港係可以咁好嘅，依家我覺得香港可以係好好嘅。所以希望香港市民呢……即係無論對我個人有咩睇法，但希望佢認為呢本施政報告……係畀到佢有希望，畀到佢有信心香港係會愈嚟愈好嘅。」

由發展局局長到特首，林鄭月娥曾推動不少發展大計，保育中環、「起動九龍東」、明日大嶼等，現在又提出北部都會區藍圖，她直言，「我係好鍾意由無到有嘅人，有啲嘢無，你可以做到佢有。」

她舉保育中環為例，「無提就係無，係咪？中環街市可能無咗，警察宿舍可能無咗，政府總部(舊址下亞厘畢道)可能拆咗，保育中環我哋做到，依家差一個項目係私人項目，唔關我事，聖公會嗰個，佢搞嚟搞去都搞唔到，我都幫緊佢，咁完整嘅保育中環就出現係眼前。」「起動九龍東」就令舊式工業區變身核心商業區，「二百九十萬平方米嘅商業大廈（面積），係透過工廈活化，或工廈重建，或用新方式賣地，仲有一百萬（平方米）起緊。」對未來的「躍動港島南」，更寄予厚望。她強調要用有規劃、有前瞻性、可推動的方法去做，「你要同事睇得到有遠景有藍圖佢先跟得到。」

她透露一早已有北部都會區的念頭，但過去受到本港政治局面所限，「一個廣深港高鐵香港段，真係打交咁、拉布，甚至社會上如果當時動員得到，可能係另一場社會動亂早過二〇一九年下半年出現咗，當日起高鐵攞撥款時都係打交。」直至中央出手，「睇到《香港國安法》落實，穩陣喇，睇到完善選舉制度，真係唔同喇」，「如果任何政府都唔係用一個更加積極態度去做，我覺得係辜負咗呢兩大措施。」

五年眨眼就過，下屆特首選舉快將舉行，林鄭月娥對去向守口如瓶，「你再問都唔答」，她會考慮哪些因素？「唔答，所有都唔答。」