Chantel望住公仔就落淚 炎明熹喊極唔出：想打自己

(星島日報報道)炎明熹（Gigi）、姚焯菲（Chantel）昨日為劇集《青春本我》拍喊戲，Chantel望住公仔便喊了出來，相反Gigi就喊唔出，她解釋平時就算想喊都會叫自己唔好喊，還自責冇用，開機拍就喊唔出，停機時就喊，好想打自己！

Gigi、Chantel、朱敏瀚及多位「聲夢」學員為劇集《青春本我》拍外景，其中Gigi及Chantel分別拍喊戲，劇中Gigi因遺失小貓而傷心到喊，但對初次拍劇的她卻有難度，見她埋位培養情緒好耐也喊不出，最後要導演引導，眼珠才有少少淚水滾動，之後拿紙巾拭淚。事後她和Chantel接受訪問，Gigi直言喊唔出︰「本身喊都會叫自己唔好喊，而且好少原因令自己喊，開機拍就喊唔出，停機時就喊，好想打自己，好無用！」還感謝導演安慰及耐心引導。

同樣要拍喊戲的Chantel，她稱拍攝時望住公仔便喊了出來。叫她幫幫Gigi，Gigi稱幫不到，她有預備眼藥水，但沒有用。看她面容有些疲倦，問她們同時兼顧拍劇及返學會否辛苦？Chantel不覺太辛苦，只要明白對白的意思便容易入腦，不會死背；Gigi也表示應付得到，不過快將測驗及考試，要更專注學習。至於可會要求跳拍自己的戲份？Gigi表示不會，不希望因為自己影響到大家。

同場的朱敏瀚表示早年入行第一部劇便是演學生，估不到10多年後已演老師角色。劇中交代他是中文老師，很受女同學歡迎，與現實中的他有點相似，還透露當年讀中一課室似動物園，小息課室門外會有一班人。問他有沒有暗戀老師？他說小學時好鍾意一位老師，多年後還參加對方的婚禮，感覺鍾意的姐姐被人攞走。最近他在節目《童你一起長大了》中接受當年兒童節目主持張潔蓮訪問，原來當年媽咪帶他經過商場，因參加公主王子比賽贏得「最英俊王子」大獎，成為入行的踏腳石。

此外，有報道指林子祥和顧嘉煇將客串飾演校長及校監一角，監製彭幼芳強調沒此事，雖然有人客串演出，但並非林子祥和顧嘉煇。