應智越艷福無邊被女圍

（星島日報報道）「細貓」應智越最近推出新歌《渴》，靈感來自朋友的醉態，MV更大玩怪誕，醜佬肥婆在酒精下都變成型男索女，令細貓艷福無邊！

細貓的新歌《渴》正式面世，雖然疫境出歌難免影響宣傳，但粉絲們相當窩心，為細貓在銅鑼灣和尖沙嘴鬧市買下大型電視廣告播放MV造勢，令他十分感動；但他最渴望的是疫情能盡快畫上句號，人人重現笑顏，並希望透過新歌為大家送上歡樂。

「好多人飲酒後會出現不同反應，好多搞笑狀態，如講英文、唱歌、跳舞、又會語無論次；在韓國讀書時，有些朋友飲完酒還會慣性地攬着垃圾桶或趴在地下瞓覺；而香港好少玩味重又有關飲酒的歌，因此將朋友的醉態寫成《渴》的歌詞，與大家分享這些趣事。」那麼細貓自己又如何？他自言是安全型，飲酒後只會想瞓覺，並且很少醉，可能在韓國被長輩逼飲練得一身好酒量，而且一定會用意志力堅持到回家；隨即提醒大家，飲酒有損健康，千萬不要過量。

《渴》曲是細貓在今年的第3首派台歌，不過今次未有機會讓他盡展跳舞強項，MV中的兩大特點是「坐着跳」及「被女圍」。事緣MV大玩怪誕，以凸顯酒精作祟下豬八戒都可以大翻身，人人都變成型男索女，順理成章，細貓自然被大班靚女包圍，享盡艷福。「唔敢當，我都係聽導演安排，戴番個頭盔先，哈哈。新歌主要想帶出大家飲酒消遣的輕鬆氣氛，並且即使拿着酒杯坐着也可以輕易的跟着節奏跳舞。」說罷還即興示範「隨意跳」，相約粉絲隔着個屏幕一起唱跳。

細貓有顏值、有身形，問最滿意身體哪個部位？他笑謂：「無喎，我唔係靠外表，外表唔得嘛，唯有行實力派，正確而言，係未有實力但努力行實力派的努力派。所以如果有機會演戲，角色性格可以去到好盡，但裸露就避免，因為身材好的人實在太多，這方面我仍要努力。至於會唔會留待第一個大型演唱會才騷肌？都值得研究，但欲知後事如何，請留意細貓之後的表演，哈哈。」