羅仲謙華Dee上身慘遭爆樽

(星島日報報道)羅仲謙為新劇《陀槍師姐2020》化身成華Dee，而拍檔洪永城大爆謙仔無時無刻模仿劉德華，惟大讚對方用心演出，還自備道具務求演得入型入格。

羅仲謙、洪永城、鄭俊弘及李成昌等為無線新劇《陀槍師姐2020》拍攝爆樽戲，劇情講述飾演黑幫頭目鄭俊弘於外面闖禍，令幫會內部出現矛盾，身為話事人的李成昌向對方施壓兼削權，鄭俊弘的手下羅仲謙代為受罪被李成昌以玻璃樽仆爆頭。謙仔拍攝被爆樽場面一take過完成，最搞笑是當cut機後，他即笑問：「我個頭（指髮型）有無亂到？」

飾演黑幫軍師的洪永城，表示戲中跟羅仲謙、鄭俊弘及李成昌在幫會中是四人組合，他為漂白社團會構思做正行生意，但跟鄭俊弘則十足經典古惑仔經常講打講殺又賣毒品，所以跟兩人關係對立。洪永城大讚今次角色好玩，劇中角色會有不少人生交叉點，會為求目的不擇手段。對於飾演其手下的羅仲謙，洪永城透露兩人有不少對手戲，他大讚對方用心演出，並會自備道具到拍攝現場，務求演得入型入格。他笑說：「謙仔會帶埋幾本公仔書《龍虎門》及《風雲》等放在背囊，又會準備香煙同戴頸鏈，而且為了今次角色更睇番劉德華以前演繹古惑仔的電影作為參考，因為他要瀟灑、市井又靚仔的格調，見他着牛仔褸同髮型都係華Dee嚟啦！仲要無時無刻都睇劉德華，我話佢：『你扮唔到佢啦！放棄啦！』」

談到跟前輩李成昌演對手戲，洪永城坦言不時獲得對方教導，能夠帶動到一眾後輩演員投入演出。他說：「佢會話你知應該用甚麼情緒，甚至一舉一動，他的每一個動作都充滿氣勢，好有戲味。」雖然戲中動作戲不多，但洪永城笑言自己有好多桑拿及拳館戲分，又搞笑謂認為編劇寫出來要侮辱他，皆因同場經常有「健美先生」關曜儁同「大波謙」羅仲謙，相比之下令到他身形變得好瘦削。他說：「我已經盡力操fit，但不及他們操得咁靚又大隻！每次拍桑拿戲，都係侮辱呀！」

首次跟洪永城合作的謙仔，笑言感覺相逢恨晚，因為對方轉數夠快，做對手最緊要好玩，因為相處傾偈時間多過拍戲。提到演出被爆樽戲，謙仔坦言入行以來今次首次被爆樽，以往爆人樽居多，但心情不緊張，因為有演出爆樽經驗，只要有技巧性就不會太危險。一身牛仔Look戲服的謙仔，感覺相當有劉德華的「華Dee」感覺，他笑言今次角色綽號正是「華Dee」，由於有搞笑成分所以有少少模仿劉德華的「華Dee」。他說：「為了這個角色我有睇番劉德華演出的電影《黑馬王子》，戲中劉德華的拍檔是張家輝，而我在劇中的拍檔是關曜儁，兩者的架構好似。」