王浩信：取消緬甸外景唔可惜

(星島日報報道)無線新劇《踩過界II》昨日於上水河上鄉拍攝外景，劇情講述「盲俠」王浩信身陷險境，張振朗駕着電單車載張曦雯衝入人群救人。張振朗透露考電單車牌成功後首次拍劇時親身上陣，笑言終於成就解鎖。

劇情講述蔡思貝帶朱智賢入鄉公所避險，留下「盲俠」王浩信面對大批起哄的鄉民，危急關頭時張振朗駕着電單車載張曦雯衝入人群。張振朗駕電單車表現揮灑自如，更載張曦雯到公共洗手間，相當招積。張振朗笑說：「難度一次比一次高，第一輯拍攝載王浩信係用車架拍，之後拍幾套劇都仲係用替身，到今日終於都成就解鎖。」問到王浩信可有信心坐對方電單車尾？他笑說：「都有信心嘅，頭先見佢都有板有眼，振朗做嘢好穩陣。」

此外，提到《踩II》原定到緬甸拍攝外景，但因疫情關係已鐵定取消，問到是否因此延長了拍攝時間到5月？王浩信說：「原定都係拍攝到4月，現時都係延長咗少少。（緬甸戲分點安排？）轉去大澳都適合，拍出嚟嘅效果應該唔會影響可觀性。」問到未能出發到緬甸可覺可惜？王浩信說：「其實去邊度拍，對演員嚟講都一樣，都係做番自己角色。公司都係保障大家安全，怕去到或者返嚟要隔離，變相浪費時間。」張振朗笑說：「我哋一齊拍嘢好開心，去邊都好，最緊要靚腳。」

另外，見飾演（癲姐）的蔡思貝左眼沒有化眼妝，她透露日前做了割除眼瘡的小手術。蔡思貝稱個多禮拜前於錄影廠拍攝喊戲，當日大意用手抹眼後，最終變成生眼瘡。她說：「我唔敢化眼妝，想畀眼唞一兩日，拍嘅時候盡量就位。」她轉述醫生稱生眼瘡部分原因是壓力及疲勞所至。問到現正拍劇會否難以有足夠休息？她說：「都OK啊！公司好好，現時都係拍外景，每日都係拍一組。」

此外，張曦雯、湯洛雯、戴祖儀、吳若希與蘇可欣昨日在中環出席5G直播活動，眾女沒戴口罩上台，活動現場未對外開放。張曦雯表示在疫情下有工作感到開心，認為活動安排得很好，她指男友曾到過的健身室事後有人確診新冠肺炎，因而自我隔離14日，她則為男友送飯，要透過視像對話才能見面，而遠在美國的父母，更因疫情及治安問題未敢開店，她除了擔心外更要寄口罩給家人。

吳若希指自己是收足酬勞工作，相信未觸及政府禁止4人以上集會的禁令。提到有傳胡鴻鈞與蔡思貝交往，為此與好友許廷鏗反面，吳若希說：「現在都很老友呀！（幫邊個？）他們聚會都沒預我，現在連老公都不理我，回到家個女都推開我呀！（做和事佬？）等我了解他們因何分開先，只要朋友幸福，我都為他們開心，但首先要知道傳言是真假，傳言沒法求證的話，大家估估吓沒意思。」