翠如拍新劇被活埋 多得攝影師救命

(星島日報報道)黃翠如與森美昨日為新劇《過街英雄》到錦田太陽谷拍攝外景，劇情講述翠如被泥石活埋，弱質纖纖的她原來不怕小昆蟲，對於坑內有跳虱、蜘蛛及飛曱甴等都毫不懼怕，唯獨擔心被紅火蟻咬傷。

昨日新劇《過街英雄》拉大隊到錦田拍攝一場黃翠如、吳嘉儀與唐嘉麟被活埋的戲分。翠如透露早上已到現場，於坑內拍了整個早上，期間鏟泥車要將泥石推到他們身上，而幕後工作人員就會親手將泥撥到他們臉上。

談到坑內環境惡劣，翠如笑稱睇到坑內有大量跳虱跳來跳去，搞到全身痕癢。她說：「其實大家最擔心係紅火蟻，因為之前都有工作人員被咬傷晒。」翠如透露拍《過》劇去了很多古裝外景場地取景，幕後工作人員則對她照顧有加。她說：「之前黃雨去天外天拍外景，佢哋會特別照顧、扶住我，但係佢哋嘅機器好重，仲要爬上爬落，其實係好危險。」

談到她跟幕後工作人員關係非常好，翠如笑笑口說：「係呀！我見佢哋多過見屋企人，一齊捱通宵、過節，我哋係一家人。今日呢個攝影師救咗我好多次，係我恩人，因為佢知我容易受傷，會幫我試晒位，先叫我埋位。」

此外，翠如大爆日前森美拍動作戲時扭傷腳踝，傷得又紅又腫。森美一拐一拐地到場，他表示沒有大礙，他笑道：「場戲係由一部小巴咁高跳落嚟，拍咗好幾次都無事，點知落地踩中墊與墊之間的空位。我聽到啪一聲，都怕傷到十字韌帶，之後睇醫生話係腳踭筋膜撕裂。當時好痛好痛，但做咗一樣好型嘅嘢，就係問導演個鏡頭用唔用得。人哋3樓跳落嚟，我就一部Van仔，哈哈！」

至於翠如又大爆他拍攝動作戲時自薦加動作，森美笑道：「就咁捉住一個人，咁不如加一個撥手動作，加個擒拿手，好睇啲嘛！好似今日係我太太生日，拍完外景今晚仲要廠景，咁就同唔到太太慶祝，既然犧牲咗時間，就不如做好佢。」

問到太太可有投訴？森美表示沒有，日前於廣東道拍攝時，翠如還充當軍師，給意見讓他買禮物給太太慶祝生日。他笑道：「無買好多年㗎喇，翠如話太太生日要開工，要買禮物。」森美透露前日已將小禮物送給太太，相信她會喜歡。