Hana同Jinny夾好口供有備而來,還晒演技。
Hana同Jinny夾好口供有備而來,還晒演技。

菊梓喬(Hana)、吳若希(Jinny)、周柏豪等為公司拍賀歲節目,Hana同Jinny齊齊現身,為被指爭獎不和一事解畫。二人事前已夾好口供有備而來,對《勁歌金曲頒獎典禮》當晚宣佈Hana奪「最受歡迎女歌星」一刻,Jinny勁開心拍手表情被指浮跨,Jinny說:「非常精彩,佢(Hana)上去攞獎前,我哋嘅話題就係,死啦,我坐佢側邊,做乜都衰,笑又衰、唔笑又衰,最慘佢係冇反應。」Hana急澄清,自言當時太大反應太激動,反問Jinny:「你見唔到我震晒?我喊呀,我唔係冷靜,係過度興奮激動!」
Jinny續解釋當晚大笑原因,說:「笑成咁,我唔係笑緊任何人,係笑緊我自己,『嚟啦,我又坐喺你隔離啦,又有嘢畀人影、畀人寫』,個心係咁諗。」她說希望跟公司申請以後盡量不跟Hana坐在一起,「因為好大鑊,好辛苦呀,坐埋一齊就話不和,要同老闆反映下,早知我唔去頒獎禮啦!」
至於Jinny於社交平台上載眾歌手合照,偏偏就沒有坐隔離的Hana,被網民問「是否專登唔影一姐?」她說當時Hana不在位,然後入戲說:「張相唔係想表達我不滿菊梓喬,其實好認真嘅,我係想表達我不滿周柏豪,真嘅,我同周柏豪其實好不和」,然後說當時專登沒影坐右手邊的柏豪。跟住到柏豪加入這不和二人組變三人組,Jinny再說跟柏豪不和原因,「就係我妒忌,憎晒所有靚仔過我老公嘅人。」(攝影:鄧國良)