一對新人切祖兒與阿Sa送的價值24萬結婚蛋糕。
一對新人切祖兒與阿Sa送的價值24萬結婚蛋糕。

鍾欣潼(阿嬌)與老公賴弘國的婚宴於晚上9時開始,由BOYZ為婚宴打開序幕,一上到台關智斌(Kenny)就話:「好感動呀,因為大家都係同阿嬌一齊成長,今日見到佢真係好感動。」然後就播放二人早前在美國pre wedding片段。播完片後,現場小提琴奏出Westlife嘅《Beautiful Life》,新娘子阿嬌換過靚靚婚妙,由老闆楊受成帶領入場,全場歡呼聲及掌聲四起。行到台前,楊老闆將阿嬌交給賴弘國後不忘再次叮囑說:「你要好好對阿嬌!」一對新人跟住在台上致辭,阿嬌邊喊邊話:「好感謝上天畀我遇到所有愛我嘅人、多謝公司18年嚟咁照顧我、幫助我。多謝老闆楊博士同埋我經理人Mani(霍汶希,我都想同我媽咪、公公(老爺)、婆婆(奶奶)說,以後我跟弘國(老公)一齊孝順你們,謝謝!」賴弘國亦向大家致謝,說:「感謝大家來到這個地方,見證我們幸福的時刻,然後我特別感動,也特別感謝我老婆的公司英皇對於我們的幫忙。」然後對住台下的嬌媽話:「放心把女兒交給我。」場面既浪漫又感人。

隨後工作人員就推出容祖兒同蔡卓妍(阿Sa)送給新娘子高1.9米、價值24萬的結婚蛋糕,蛋糕外形似足哈爾移動城堡。切完蛋糕,BOYZ就叫容祖兒同阿Sa就上台講講蛋糕背後的心思,祖兒一上台卻謂:「我想話畀你聽你老公畀到你嘅嘢,我哋都畀到!」阿嬌笑住問:「係咩?真係㗎?」張致恆(Steven)說: 「祖兒,攞出嚟得嗎?」祖兒秒回並指住蛋糕:「攞咗啦!」阿嬌甜笑話收到大家的愛,這份愛永遠在心中。
之後就到楊老闆上台致辭:「多謝各位親友,你哋今日蒞臨Michael同阿嬌嘅大喜日子,我喺呢度祝福佢哋百年好合,永結同心,幸福快樂。但我希望佢哋唔好連生貴子,因為阿嬌大咗肚呢,就做唔到嘢,因為對英皇娛樂嚟講,佢係其中一個最搵錢嘅藝人。」阿Sa就插嘴:「金蛋呀!我幫佢頂住先!」阿嬌聽到就精靈說:「即係幫我大住肚先係咪?」阿Sa爆笑回應:「幫你做住嘢先呀!」