颱風「山竹」來襲,卓韻芝跟丈夫梁子賢如期於中環外國記者會舉行婚宴,鄭秀文(Sammi)、梁詠琪(GiGi)與蔡卓妍(阿Sa)組成「星級姊妹團」,導演許鞍華、郭啟華、田蕊妮、蔡一智與徐天佑等紛紛到賀。

為著上靚靚婚紗而勤力健身的卓韻芝,穿貼身魚尾白婚紗示人,騷香肩及力谷事業線,十指緊扣新郎現身合照。新娘卓韻芝接受訪問時笑說:「真係打風都打唔甩,一直都有留言關於風暴消息,上網搜尋山竹係夫妻果,感覺好切合結婚。」問到可有考慮過賓客安全?她說:「係啊!啲長輩食完嘢就會走先,做完訪問就會即刻同佢哋影相,等佢哋走先。」

姊妹團在婚宴前接受訪問,她們同樣穿上淺粉紅色姊妺裙。問到早上的接新娘環節? GiGi說:「無呀!可能佢唔捨得玩新郎啦!」阿Sa則表示是日最重要靚,無謂玩人時又玩到自己。Sammi笑道:「好替卓韻芝開心,佢件婚紗咁靚,無謂玩爛佢件婚紗啦!我哋主要任務係伴住佢影相,見證佢一陣間嘅簽紙儀式,負責擺甫士。」

問到酒量如何,可會幫手頂酒? 阿Sa笑謂:「我都頂得幾杯嘅!」Sammi稱:「我個樣好似飲得,其實普通咋,飲少少啦!睇吓咩酒,好飲就飲多兩杯。」至於可有傳授夫妻相處之道給卓韻芝,GiGi說:「婚前派對阿芝都有問我哋嘅,都有分享吓。今日好睇得出阿芝嗰份快樂同喜悅,今日係最神采飛揚嘅一日。」送上甚麼賀禮?Sammi跟阿Sa都笑笑口表示不便透露,GiGi則表示代阿芝捐錢做慈善,令新娘認為此舉很有意義。至於可會催阿芝生B? Sammi直言:「佢想生就生,唔生就唔生啦!」

此外,阿Sa又自爆今早才問卓韻芝做姊妹是否需要做人情?她謂:「入到房我先開Speaker聽,幾尷尬呀!不過真心戥佢好開心,會補番禮物畀佢,因為我同阿芝都係識於微時。」問到阿Sa會否落力搶花球?Sammi幫口:「嘩!佢年中接咗幾個喎!」阿Sa回答:「唉!我臨出門口都有問助手,究竟我仲有咩朋友未結婚,之後諗到得番容祖兒一個,差佢一個就搞掂晒。」Sammi又取笑阿Sa:「你接埋接埋咁多可以做乾花球喎!」阿Sa說:「咁我今日避一避先喇!」