Vivian話要學基仔要好堅強上台,但獨唱時不敢郁。
Vivian話要學基仔要好堅強上台,但獨唱時不敢郁。

古巨基第二場紅館個唱請來周慧敏(Vivian)任特別嘉賓,在基仔墮台後上台的Vivian,一見基仔即攬到實,基仔安慰她,說:「我冇事,冇事,唔好嚇親。」Vivian就震晒咁話:「我的確係嚇親!不過我依家見到你,我好開心!感謝神,我會同你祈禱。」基仔又再安慰好友,說:「我係好人,好人個天一定會睇實嘅!」然後他向觀眾介紹,說:「阿靚女(Vivian)咁多年不單係我好朋友,我哋已經係家人咁親,咁多年我都當有個好姐姐。」Vivian就笑著回應,說:「我當你係哥哥呀!有時當你係爸爸添,佢有時好怪獸家長㗎!你小心啲,你估你仲係基仔?你係基哥㗎啦!」基仔就幽默笑道:「嚇死我,以為你會話我係基X添!哈哈!」
之後基仔落台換衫,Vivian獨唱時非常小心,恐防再有意外,在台上邊準備邊說:「我唔會郁㗎啦!咦,點解唔見咗個交叉(mark位貼紙)㗎…?」
演出過後,Vivian表示基仔發生意外近5分鐘之後,才有工作人員敢通知她,大家擔心嚇倒她,影響她演出情緒。她說:「我知道佢發生意外之後,驚到都唔識畀反應,但係我都冇法入到去睇發生咩事,只係衝出來後台口,望住個電視,等到佢升返上台嗰刻唱到歌,先安心。大家都預咗我可能上到台會喊,但係我同自己講真係唔好喊,我一喊就影響晒我哋表演嗰兩首歌,而且基仔咁正能量繼續企喺台上唱歌,我都應該好堅強咁出台,帶畀大家開心平安的感覺。佢發生咁大件事,可以完成晒個騷,我好佩服佢毅力。」(周慧敏臉書圖片)