古巨基的紅館騷昨晚舉行第二場發生意外,基仔唱完第一首歌《爆了》後,不小心跌落舞台中間個窿,大叫一聲後,全場靜默並熄燈。相隔約10分鐘後,基仔行出台,表明唱多首歌再入後台睇傷勢,幸最終再出場唱至完騷;完騷後為保安全,他亦第一時間到醫院檢查,之後他在臉書報平安,上載親述傷勢的片短,並宣佈今晚如常開騷。 基仔一臉倦容,講到傷勢時都有摸著頸背。他說:「啱啱去咗醫院做檢查,照咗磁力共振,我其實落地個位係頸背下邊,所以就照咗頸背位,啲骨係冇事,大家可以放心,仲有醫生講係啲Muscle拉親,所以你見可能有少少梗梗哋咁樣,但呢個絕對唔影響我同大家演出嘅,所以大家放心,唔使擔心我嘅,聽日(今晚)照舊如常紅館見。」。