軒仔做火焰頭髮護理影海報,寓意團火燃燒埋出嚟。
軒仔做火焰頭髮護理影海報,寓意團火燃燒埋出嚟。

張敬軒今年6月開紅館騷,其演唱會海報相當搶眼,成個頭著火,寓意團火燃燒出嚟。其實軒仔邀請了印度髮型師Mr. Gala為他做火焰頭髮護理,受損及開叉髮尾在燃燒後會自然脫落。成個頭著火變BBQ爐頭,軒仔不忘拍片留念,工作人員更啜核地用燒烤叉叉起棉花糖、牛扒、雞翼作狀燒嘢食。 軒仔邊拍片邊搞笑道:「我聞到頭髮嘅味,點吖喂。你睇我班同事幾有人性,我以為自己呢個係人頭,但原來我呢個係爐頭,嘩Cult到爆呢件事。(㷫㗎喎!)我冇理由Feel唔到㷫嘅。」發文最愛用Hashtag的軒仔更放笑彈話:「#真火爆小甜甜 #出火 個人頭我講緊 簡直就係#為藝術而犧牲 #人體BBQ #imstillalive2018 其實係好安全嘅 #毛髮 #我仲有好多 #買飛啦喂 #唔好問我啲飛我自己都撲緊 #有嘅話唔該話聲過我知 多謝團隊嘅精心策劃,幫我遠道喺印度同日本請師傅 #幫我出火」。

另外,相隔4年再開紅館騷,軒仔話最難係突破上次演唱會,「因為14年有譚玉瑛姐姐嗰part嘅《青春常駐》、有好sexy嘅係我同Shirley姐姐(關淑怡)嗰part嘅互動。一眨眼4年過去,今次呢個演唱會做乜嘢好呢?今次會揀好多我鍾意嘅作品、大家好鍾意嘅作品,用好唔同嘅形式去演繹出嚟。」