轉戰導演的彭秀慧改編同名舞台劇,自編自導電影《29+1》,她開心能夠入圍金像獎「最佳導演」、「最佳編劇」及「新晉導演」。「太意外,多謝投票嘅人,隨遇而安。見到咁多提名非常驚喜,我預咗周秀娜入圍,當欣宜入圍女配角我係非常興奮。最佳原創電影歌曲、原創電影音樂,由一開始我都好想佢哋得到認同,今次順利入圍,係開心到會喊。」 鄭欣宜在電影《29+1》飾演樂天中女,並入圍金像獎「最佳女配角」,她表示驚訝,估唔到有得角逐獎項,「我同導演彭秀慧講,死啦,我唔係演員,我好驚我唔識呀,跟住佢畀咗好多信心我。佢一定要攞最佳導演獎,因為佢喺我心目中係最佳導演,如果唔係佢嘅話,我唔會有信心去做到黃天樂呢個角色。我講到好似得咗獎咁,因為我完全冇諗到我會得到提名,因為我根本唔熟悉電影呢個世界,呢個世界唔係屬於我,我搞音樂嘛,所以呢件事好癲、好癲呀!」 有份演出《救殭清道夫》的邵音音亦入圍女配角獎,她笑指「咁多大片包圍我,有報我個名真係好開心,恭喜所有入圍嘅朋友,希望佢哋同我一樣咁開心啦。」