草蜢的蘇志威(蘇老闆)明日50歲生日,昨日他提早與100位歌迷開戶外Party慶祝,蔡一智帶埋老婆仔女參加,齊齊與歌迷玩遊戲。 歌迷邀請阿細的父母、好友葛民輝、張衛健和星級Fans容祖兒等拍祝賀片送驚喜,其中葛民輝和張衛健最搞笑,阿葛大爆草蜢初出道同居九龍城的時候,蘇老闆經常只著底褲周屋走,所以一直都覺得他特別「威猛」和「硬朗」,又笑言要叮囑他:「喂,你年過半百架,著返條褲啦,啲女都大個,唔好再吊吊揈!」張衛健就窒吓窒咁唱生日歌,他說:「呢首chok版生日歌特別送畀蘇老闆,祝你身體健康,年過半百,有心有力。祝你黃雨點淋都唔病,馬拉松跑極都唔冧。阿嫂,畀啲3鞭酒你老公補吓,擔保佢鞭鞭有力,生日快樂!」他七情上面又手舞足蹈,全場爆笑。 玩遊戲期間,蘇老闆透露早前他暈倒馬拉松賽事時,得到一位陌生人悉心照料,因為對方替他聯絡阿智,事後蘇老闆問阿智取回對方聯絡,請食飯答謝;阿借即乘機扁嘴投訴蘇老闆話過請他食鮑魚,但沒有下文,蘇老闆立即安慰他說:「唏,我唔係請佢食鮑魚吖嘛!」 當唱生日歌和切蛋糕時,蘇老闆兩位囡囡上台獻花和咀嘴,還有太太劉小慧隔空Kiss,非常溫馨。蘇老闆坦言生日會既感動又開心,最勁搵到他的父母拍片。至於生日願望,他希望大家都身體健康,開心快樂。最重要多謝大女Yumi花了9小時炮製蛋糕給他,不捨得吃呢!