岱融哥大讚劇本正,作為演員演起來特別爽。
岱融哥大讚劇本正,作為演員演起來特別爽。

TVB劇《牛下女高音》播出唔夠兩星期,不但口碑唔錯,最高有成27.1收視點,身為主角的吳岱融同張振朗當然開心。其實呢套劇一度因為黃心穎的偷食事件,搞到變成倉底貨,仲諗住搵江嘉敏補拍過先推出,估唔到依家成功翻生做埋台慶劇,仲有咁好成績添!雖然個劇咁多波折,學岱融哥話齋「真係似坐過山車咁!」但係問到佢同張振朗有冇怪過黃心穎累街坊,佢哋都異口同聲話:「真係冇怪過佢!」憑該劇成功破咗「地獄黑仔王」惡名的張振朗,仲話睇嚟套劇條命好硬,咁大家嚟緊就睇吓收視,可唔可更上一層樓啦!撰文:杜淑霞 攝影:李維隆

張振朗好開心該劇收視和口碑都好,令他成功「破地獄」。
張振朗好開心該劇收視和口碑都好,令他成功「破地獄」。
張振朗覺得套劇集合不少如岱融哥的好戲前輩,可惜跟他們的對手戲不多。
張振朗覺得套劇集合不少如岱融哥的好戲前輩,可惜跟他們的對手戲不多。

岱融哥話最初收到該劇劇本時,已覺得係妤嘢嚟,「真係要讚吓編審龍文康,佢真係寫得好好,除咗難得用中佬做主題,內容仲夠晒貼地,演起嚟都容易投入好多,相信觀眾睇起嚟都好易有共鳴。」講到角色「大爆」,他都認為同自己幾似,「我對住老婆都係報喜不報憂多,好似『大爆』咁都係唔想佢擔心啫!(係咪都咁怕老婆?)我哋呢啲係尊重。」不過講到「陰柔」,佢就強調:「我諗每個男人都介意人咁講,所以話個劇講出好多男人心聲,貼地囉!」

中佬合唱團齊搵銀
該劇本來慘被黃心穎連累變倉底貨,岱融哥坦承:「真係好似坐過山車咁,拍嘅時候好開心,點知又話播唔到,後尾又變咗台慶劇喎!心情真係好似坐過山車咁㗎!」不過他無對心穎不滿,「真係冇怪過佢,都唔到佢控制嘅。」講到個劇成績好,他都覺得好開心,仲希望可以多啲這種題材劇集,「暫時劇集口碑同收視都不俗,都希望可開拓中佬主題嘅劇,其實中佬有好多故事可以講。」他更想劇中的中佬合唱團可以繼續維持落去,「我哋一班中佬合作得好開心,平日通常分開合作,對手戲又唔多,今次大家真係過足戲癮,呢個合唱團現實可拍住演出,搵埋真銀就更加好啦!」

戲中和現實同心穎都一樣老友鬼鬼的張振朗,由始至終都冇怪過對方。
戲中和現實同心穎都一樣老友鬼鬼的張振朗,由始至終都冇怪過對方。
岱融哥劇中飾演心穎包租公,有不少對手戲。
岱融哥劇中飾演心穎包租公,有不少對手戲。


張振朗坦承最初個劇播唔到,仲畀人封做「地獄黑仔王」,不但冇怪心穎反而諗係咪自己問題,「嗰時都有擔心係咪自己累街坊呢?但依家播到仲做埋台慶劇,我成功破咗地獄啦!但我真係冇怪過心穎,我哋係朋友,冇佢呢個咁合拍嘅對手,唔會有咁多火花,我哋互窒啲戲,係一齊度出嚟,好似有場戲我仲突然將成個橙塞入佢個口度,佢個反應好真實,要大家好熟先做到。」講到每個劇都有佢條命,他即搞笑說:「咁呢個劇條命好硬!」

開到口恨唱主題曲
對於《牛》劇中唱《一生何求》獲好評,他坦承恨有多啲唱歌機會,所以希望自己有份演的劇都順利出街,特別是首部擔正的《堅離地對堅離地》,「聽講會喺馬來西亞播先,呢套劇我瞓晒身去演,仲第一次唱埋主題曲,所以特別想佢出到街。」32歲的張振朗又指跟26歲女友楊偲泳,會互相支持對方作品,雖然早前被傳媒影到見埋家長,感情穩定,但暫時未有結婚打算,「我哋依家仲係事業搏殺期,有車有樓先諗結婚啦!」經常在社交網放湊姪仔日常的他,坦承好鍾意小朋友,將來一定做老竇之餘,仲話拍劇都想過吓老竇癮,「除咗做癲佬、奸角外,我好想試吓演好似《阿郎的故事》嗰啲咁嘅老竇,成日整蠱吓個小朋友應該幾有火花㗎!」

劇中「大爆」好鬼怕龔慈恩飾演的老婆「靜怡」。
劇中「大爆」好鬼怕龔慈恩飾演的老婆「靜怡」。
現實中,岱融哥都好尊重老婆鍾淑慧。
現實中,岱融哥都好尊重老婆鍾淑慧。
張振朗訪問當日巧遇歐瑞偉,更自爆當日該劇宣佈唔播時遇上對方,兩人互拍膊頭互相鼓勵,今天再遇又是另一番心情。
張振朗訪問當日巧遇歐瑞偉,更自爆當日該劇宣佈唔播時遇上對方,兩人互拍膊頭互相鼓勵,今天再遇又是另一番心情。
張振朗最希望跟龔嘉欣首度擔正的《堅離地對堅離地》能夠順利播出。
張振朗最希望跟龔嘉欣首度擔正的《堅離地對堅離地》能夠順利播出。
張振朗跟ViuTV藝人楊偲泳今年4月正式公開戀情。
張振朗跟ViuTV藝人楊偲泳今年4月正式公開戀情。
今次《牛下》難得以一班中佬做主題,岱融哥都希望中佬演員憑此發圍。
今次《牛下》難得以一班中佬做主題,岱融哥都希望中佬演員憑此發圍。