葉太(中)同袁彌昌(左)鬧翻,容海恩頓成「磨心」。資料圖片
葉太(中)同袁彌昌(左)鬧翻,容海恩頓成「磨心」。資料圖片

修例風波令社會大撕裂,不少人因政見不同「反面」。其中新民黨立法會議員容海恩的丈夫袁彌昌,近月多次高調撐示威者,同新民黨主席葉劉淑儀唔多啱嘴型,原來袁彌昌本月初已辭去由葉太創立嘅匯賢智庫政策顧問一職,強調係同葉太「和平分手」。

不過,葉太接受傳媒訪問時炮轟袁彌昌,批評對方無貢獻「幫唔到手」,強調係「我炒佢」,仲叫袁彌昌「分手」唔好唱衰舊東家。袁彌昌在Facebook回應時,大讚葉太是好上司,「其實阿太平時對我哋好好嘅,係個好上司嚟,不過佢又真係好有性格,可能呢排心情唔好啫,唔好怪佢。」

袁彌昌在17年辭去民主思路總幹事後,加入曾俊華的特首競選團隊,之後獲葉劉淑儀青睞,邀加入新民黨擔任政策總裁,其後擔任匯賢智庫政策顧問。袁彌昌去年同葉太「愛將」容海恩結婚,葉太更大爆袁為追求容海恩才加入新民黨,一對新人更請「媒人」葉太飲「新抱茶」,估唔到咁快鬧翻,成為「磨心」嘅容海恩唔知點睇?佢話從來唔過問丈夫工作,亦未聽過葉太就袁彌昌嘅工作向佢抱怨。