翠如即場向工作人員及藝員朋友派發囍餅咭。
翠如即場向工作人員及藝員朋友派發囍餅咭。

黃翠如、陳自瑤、糖妹等為遊戲節目《娛樂大家》擔任嘉賓,剛剛在外地補舉行婚禮的翠如,即場向工作人員及藝員朋友派發囍餅咭,提到餅咭上的蘋果樹圖案設計別致,翠如冧爆指是由老公蕭正楠親自設計,圖案取自二人的定情蘋果樹。問到翠如可欣賞老公的構思?她說:「好過冇,夠簡單幾好呀。(利是封都係蘋果樹?)好提議呀,可以湊一套。(沉醉緊新婚喜悅?)阿蕭已經投入咗另一角色,只得我自己繼續玩喇,不過我都傾緊一個新的旅遊節目,暫時未傾好去邊,相信近幾個月會成事,拍檔是洪永城,大家有4年冇一齊主持旅遊節目。」

阿蕭將與老友曹永廉於九月舉行演唱會,翠如指是二人首次在香港演出,笑說:「都幾得人驚,兩個男人可以好朋友到搞到一壇咁的演出,佢哋已經一齊去過好多次Trip,可能仲多過我同阿蕭去旅行次數,結婚時阿廉是伴郎,大部分時間佢都企我哋中間,當時佢好感動、好似佢嫁女咁。(第時你生仔跟埋入產房剪臍帶?)跟跟吓會唔會佢自己有咗?(演唱會上台嗎?)冇邀請我,佢兩個嘅世界未必想有我喺度。」