(星島日報報道)母親節將至,毛舜筠與林淑敏昨日以代言人身分出席母親節活動,毛姐除配合主題「憑健康答謝媽媽的愛」,講及去年及今年的母親節外,更鮮有到提到老公區丁平,原來區丁平在頒獎禮當晚,以兩句冧爆說話賀老婆封后,o氹得毛姐十分開心。

  毛舜筠(毛姐)和林淑敏昨以代言人身分出席維特健靈母親節活動時,談到母親節,毛舜筠表示長女區令山不在港,去年跟幼女區亦山和老公區丁平一起度過,今年亦會拉住幼女過,但記得兩個女兒曾唱英文歌上載到社交網站送給她,惟設定只供家人睇到,首次睇到後冧到不懂得形容。問到是否冧過老公唱歌她聽?她說:「老公無唱過歌,應該各有各冧。(老公是浪漫的人?)佢呢啲係後區丁平式浪漫,好似我金像獎得獎當日,佢傳兩個訊息畀我,頒獎前話『淡定啲』,頒獎後問『高興嗎?』」

  毛姐又笑稱老公遭幼女投訴,指她得獎全家人應該要好高興,好似奧斯卡一樣,但在家人的群組上沒有太多留言。她說:「對我來講嗰兩句已經冧爆,老公性格好Cool。」

  為該品牌擔任代言人已5年的林淑敏,笑言想一直做下去,發現乳癌後有保持吃該品牌的保健食品,更笑謂自己能夠活到80歲,希望老公也能同活足這個歲數,現時每年她都會身體檢查。本身喜愛跑步的她,笑言家外的環境好適合跑步,但老公無份陪跑,因為老公跑10分鐘就話見頭暈,跑半小時就想嘔,夏天嫌多蚊,冬天又怕凍。

  談到毛舜筠憑電影《黃金花》奪得影后殊榮,她說:「佢真係實至名歸,無諗過咁有實力嘅演員肯放下去演繹咁痛苦的媽媽角色,她是一個好好的學習對象。」談到為該品牌擔任代言人的藝人有不少都是影后視后級人馬,問到可會視她們為目標?她說:「我唔使啦!我長命百歲就得,自己鍾意演戲,唔想將呢啲視為目標,寧願享受演戲。」