(星島日報報道)張建聲、郭偉亮(Eric Kwok)和何浩昌(肥腸)在新電影《3個綁匪7條心》中扮演三個綁匪,鬧出不少笑料。Eric Kwok笑言在拍攝現場經常爆肚,搞到被伍姑娘鬧;張建聲則自爆有場嘔吐戲,險些嘔到伍姑娘身上。

  今次三人在新戲飾演綁匪,Eric笑言拍攝期間經常對住伍姑娘爆肚,但對方招架得住,之後就會鬧人,不過只是開玩笑。張建聲則笑言與肥腸有場嘔吐戲,險些嘔落伍姑娘身上,又爆跟拍檔Eric Kwok和肥腸於鏡頭外經常笑到癲,尢其是Eric Kwok認真做戲特別好笑,所以跟對方做對手戲好慘,因為忍笑好辛苦,Eric表示:「我真係唔知點解佢哋覺得咁好笑,但拍攝時我都有笑,嘔吐場面的戴頭套造型實在太瘋狂啦!」

  Eric又指今次劇本好多對白,也是接拍的原因,對他來說是一大挑戰,因為以前拍的電影對白都不多,所以覺得既然監製今次夠膽找他,一於大膽嘗試:「本身性格跟個角色完全兩回事,我平時好少說話,所以在片場好彩跟大家好夾,覺得好輕鬆,成日傾偈搞到舌頭肌能好順。拍完戲連廣東話都進步咗!」

對於戲中跟陳婉衡有親熱場口,肥腸笑言本身好怕醜,加上對方被封為「人間胸器」,初時開工直情不敢跟對方說話,他笑說:「拍攝前大家會溝通,不過拍完這部戲後,令我克服不到對女生的恐懼,陰影更加大。」