(作者簡介)李辰安,從事創作二十年,開拓城市感覺派文風,與讀者一起懷舊,穿越香港時空找尋生活新旨情。

  關於曾經是我偶像的宋慧喬將下嫁宋仲基的消息,我想說,大家終於認識到甚麼是旺夫的女人。

  宋慧喬未嫁何以稱之為旺夫命?世代那麼開放,我亦無謂故作拘謹,索性引用眾多娛樂新聞報道來總結︰宋小姐,即未來的宋太,出道以來,從李炳憲、玄彬、趙寅成、Rain,到宋仲基,先不說皆與之爆出緋聞,每位男神都因宋小姐的關係而變得更紅。戀愛大過天,不必論戀愛過一百次還是一百零N次,值得留意的是她與他及他、他一經緊密接觸,輸出的是正能量,以及難得的附加值,這就是「旺夫」的表現。

  香港自我宣傳是盛女盛產之地,才子才女湊在一起,談的多數是《盛女經》,講到盛女一族何等超然自立、何等高不可攀,不過,來來去去都是暗示港男多數配不起,配得起的又早早結婚,於是乎,好多四十、五十歲的未嫁「妙齡女士」因為一種無厘頭的堅持,而成為本地偶像。大家何曾想過這個世界,會有旺夫偶像。

  你知我在香港土生土長,幾十年習慣香港這套文化,我差點醒不起有一種女人是旺夫的,究竟旺夫內容是甚麼?有沒有方程式的呢?於是我花了些時間去追究一下。

  「韓國女神我點知咁多啫,你問我呀?香港女仔係點,無佢哋咁鍾意整客囉,我哋係點?直接囉,好似我咁,你都知啦,同我做嘢唔好嫌我講說話快,要求又高,或者我無人哋咁識包裝。」這是敝公司一位高級經理的回應,她以效率高同無耐性出名。

  「嗱,細佬,你知佢出事喺邊度未?判定是否旺夫,不看樣子先聽其聲。聲音柔和的人,個性多半溫柔、體貼,就算長得平凡一點都係旺夫之材,你睇你位乜乜經理,講嘢好似畀鬼追咁,又無尾音,聲又粗。」首先,剛才喺我面前吹水的不是我大佬,我哋只係同事,佢叫水哥,花名「半桶水」,乜都話識,其中包括玄學命相。我因為請教佢幾句,問吓旺夫之相有哪個關鍵要點,就畀佢成天煩住晒。最頂癮這位「半桶水」興之所至,捉埋我好似做《東張西望》咁,周圍訪問人,搵回應。

  其實那位未嫁高級經理還有一個特點,眾人皆知,就是數口好過我哋嗰位好扮靚之中坑財務總監。「係嘞,佢都唔係讀會計,計數計到咁盡(我更正係計到咁準),爭資源、爭着數爭到青筋現,成日忟忟憎憎,點會旺夫?」其實呢種重視個人權益,敢於爭取,以自己為先的開明態度,乃「港女」(香港女士之簡稱)名揚天下的特性,我亦無謂淨係針對高級經理,之不過,高級經理咁精明,嫁個做生意嘅老公,豈不是可以幫他半邊天?

  「細佬,你想話佢有幫夫命?No啦,幫夫命不同旺夫命,好似韓國宋小姐,係咁易行埋你度,唔使搞咁多、做咁多,已經旺到你,是為旺夫者也。幫夫命也者,就係女人要用自己嘅努力同付出,獲取財富和名聲,令丈夫得到榮譽與成就。」

  下午茶時間,水哥拉我去一杯冰咖啡賣成四十蚊之咖啡店繼續吹水,佢話︰「乜乜經理,佢又點會幫人?擸晒啲嘢,歸佢嘅,幫夫?唔謀殺親夫都算你好運。」大佬,大佬(我今次真係要認佢做大佬)︰「唔該唔好講到咁興奮,千祈唔好人身攻擊。」

  「其實公司新嚟嗰位董事侄女,不正好就是聲線柔和,人又有禮,樣子清純,應該就係旺夫之相啦。」我想對方有家底,正所謂夫憑妻貴嘛。「哦,你講着到公主咁返工嗰位小姐呀?」大佬,人家係主席辦公室行政經理,周圍接待貴人,佢又後生,條件許可着好啲、着貴啲,無問題啫。「細佬,佢讀英倫貴族私立大學,血統與基因良好,不過,你咪以為咁就旺夫。」

  我都只係表面猜測而已,一則大家唔熟,但無理由都係Negative噃。「我同佢亦無兩句,之不過,大家都算係社交平台之友,佢除咗鋪日常同達官貴人嘅社交相,得閒就係選番首英詩出嚟分享下,簡直不食人間煙火,渴求浪漫之情躍於手機屏幕之上。」水哥指住我鼻哥,話︰「細佬,假設你娶咗呢位公主返去,恐怕你會精神衰弱,事關你要日日買花,餐餐飯要點洋燭,你最好七步成詩,英文詩噃。」(好彩唔係我,作者按。)

  明解,這種由頭到尾於溫室長大的奇花異草,若不是以個人為中心,就係以童話為中心,嫁咗畀你,Oh My God,你點可以唔係一日二十四小時侍候我啦?唉,人人都只得二十四小時,我識得變一日三十六小時咁本事,我就另有選擇啦,係唔係呀,大佬?

  「正確,除非你又係上流人,好有愛心、耐心,並且一生以侍奉女士為天職的高貴騎士,咁,兩個拍埋一齊就有機會變成王子公主的真實故事,不過,以上組合,稀罕過火星撞地球,加上我哋兩兄弟乃基層人士,所以唔好咁多幻想。」

  講咗半日真係嘥時間,唔通旺夫女士,只有韓國出品?不如單刀直入問一句︰「大佬,我哋周圍有無旺夫命之好例子?」水哥望吓我,好奇怪咁回應︰「我老婆咪就係囉。」

  我忍咗半日無問人,點解水嫂係旺夫之人?臨放工前,我終於諗通。記得第一次見水嫂,大家直覺佢有一種與別不同的氣質,不過,掛住飲酒,大家無乜深思熟慮,只記得大家散水前有位女同事,嘴藐藐咁話︰「吓,真係有女人可以頂得住『半桶水』啲口水㗎,佢老婆可以冧晒咁望住佢,聽足佢全場發噏風。」

  對,水哥唔係有呢一位毫無條件、毫無理由支持佢同欣賞佢嘅另一半,相信一定無晒自信心,無自信心就唔可以o氹得掂出面客仔,同埋o氹得掂老細,亦無今日之風生水起。假如佢娶咗個學霸,勢必句句畀人窒住,唔使好耐,恐怕水哥會變咗「蘭桂坊醉貓」,幾難撈得起嘞。

  旺夫呢門學問,都係適宜當八卦新聞咁睇,唔適宜太過考究,事關太玄太妙了,教你唔識,自學更加唔會,係咪?